Autoriteti i Mediave Audiovizive (AMA) ka dënuar dhunën e ushtruar ndaj gazetarëve të Fiks Frare të cilët po transmetonin pamje nga gërryerja e paligjshme në lumin Zezë të Niklës.
Grupi i gazetarëve u kërcënua dhe u mbajt peng për 30 minuta nga persona të armatosur. Në reagimin e AMA-s, kërkohet që rasti të hetohet dhe autoritetet të zbardhin sa më parë rrethanat e ngjarjes dhe personat përgjegjës.
Reagimi:
“Pamjet e transmetuara të mërkurën në mbrëmje (08.02.2023), në emisionin investigativ ‘Fiks Fare’ në televizionin Top Channel, janë shumë shqetësuese për lirinë e ushtrimit të profesionit nga një grup xhirimi që hetonte një rast paligjshmërie në afërsi të Niklës në qarkun e Durrësit.
Autoriteti i Mediave Audiovizive, AMA dënon ashpër ushtrimin e dhunës verbale dhe fizike që shkoi deri dhe përdorimin e armës së zjarrit për frikësimin e reporteres dhe kameramanit, si akte të papranueshme dhe goditëse për lirinë e fjalës. Aq më tepër që ngjarja ndodhi në një pronë publike, buzë lumit, ku një grup personash kryenin aktivitet të paligjshëm me pretendimin se ishin në ‘pronën’ e tyre.
AMA pret me padurim hetimin e detajizuar të këtij rasti të rëndë, duke nxitur autoritetet ligjzbatuese që të zbardhin plotësisht dhe sa më parë rrethanat e ngjarjes, si dhe personat përgjegjës të dalin para drejtësisë”-thuhet në reagimin e AMA-s.
Mbrëmjen e djeshme u publikua rasti i dhunës ndaj gazetarëve nga tre persona të armatosur të cilët qëndronin të fshehur gjatë momentit që grupi i xhirimit filmonte gërryerjen e paligjshme të lumit ‘Zezë’ në Nikël të Krujës. Gazetarët u goditën dhe u mbajtën peng për rreth 30 minuta.
Discussion about this post