Është përuruar qendra e informacionit në Radhimë, një investim që do t’i shërbejë turistëve që duan të vizitojnë Parkun Kombëtar Detar Karaburun-Sazan. Ministri i Turizmit dhe Mjedisit, Blendi Klosi nënvizoi se turizmi nuk duhet të jetë sezonal, por gjatë gjithë vitit.
Kjo është qendra e re e informacionit në Radhimë, ku turistët vendas e të huaj kanë mundësinë të marrin të gjithë informacionin e nevojshëm për këtë zonë turstike të jugut të Shqipërisë.
Ministri i Turizmit dhe Mjedisit, Blendi Klosi vlerësoi investimin duke vënë theksin në bashkërendimin e përpjekjeve për ruajtjen e mjedisit dhe zhvillimin e turizmit jo vetëm në një ditë apo sezon por gjatë gjithë vitit.
“Jemi jo më kot në një ditë jashtë sezonit turistik, për t’i dhënë kuptim zgjatjes dhe jetëgjatësisë më të madhe të zhvillimit të turizmit në vendin tonë. Vlora dhe shumë zona të tjera, të cilat kanë potenciale të vërteta turistike, është e patolerueshme dhe e pafalshme dhe aspak logjike që të shfrytëzohen vetëm brenda sezonit turistik”.
Duke u ndaluar konkretisht tek bukuritë dhe zonat e mbrojtura të Vlorës, ministri Klosi tha se është e patolerueshme, e pafalshme dhe aspak logjike të qëndrohet vetëm gjatë një sezoni turistik.
“Në aktivitete të tilla si ky që po inagurojmë përpiqemi ta zgjerojmë shumë më tepër arsyen, pse jo vetëm turistët e huaj që vijnë me shumicë tashmë në Vlorë, por dhe turistët shqiptarë të kenë arsye për të ardhur në Vlorë, për të shëtitur në këtë Park Kombëtar kaq të bukur dhe për të marrë të gjitha kënaqësitë edhe nga kjo mënyrë e re e menaxhimit të turizmit gjithëvjetor”.
Ministri Klosi theksoi se mbrojtja e natyrës do të vazhdojë të jetë një prioritet kryesor i ministrisë së Turizmit dhe Mjedisit dhe se përpjekja kryesore deri në fillim të muajit maj të vitit të ardhshëm do të jetë e fokusuar tek pastërtia, tek ngritja e qendrave të tilla informacioni për ata që duan të shfrytëzojnë sezonin turistik.
Qendra e Vizitorëve të Parkut Kombëtar Detar Karaburun-Sazan në Radhimë është lokalizuar në një pikë strategjike për promovimin e parkut të parë dhe të vetëm detar në Shqipëri, duke qenë lehtësisht e aksesueshme nga vizitorët.
https://www.youtube.com/watch?v=R3n8497hn44
