Ish-kryeministri Sali Berisha, ka qenë i pranishëm këtë të martë në përvjetorin e 31-të të themelimit të PD dega Durrës. Ai ka thënë gjatë fjalës së tij përshëndetëse, se PD është më e fortë se kurrë dhe nga tashmë e në vazhdim do të bëjë opozitë të vërtetë.
“Të dashur demokratë të Durrësit dhe themelues të kësaj dege, ish-drejtues të institucioneve vendore e qendrore. Të rinj e të reja të cilët jeni sot promotori kryesor i kësaj përpjekje të madhe të Partisë Demokratike për të marrë misionin e saj të një opozite të vërtetë e të përmbysjes së narko shtetit si formë qeverisje e bazuar në krimin dhe drogën. Si një provë qeverisje që meriton në çdo aspekt të quhet regjimi më i keq. Të dashur miq, përvjetorët janë momente reflektimi dhe bilanci. Si PD ne themeluam pluralizmin politik në Shqipëri.
Themelimi i PD, shënon vendosjen e sistemit pluralist, por shënon edhe vendosjen e votës së lirë në themel të funksionimit të forcës sonë politike dhe të shoqërisë shqiptare. Sot pas 30 vitesh PD mbetet një nga dy forcat politike më të mëdha. Duhet të pranojmë që forcat politike që përmbysën diktaturat komuniste në vitet ’90, nuk i rezistuan kohës. Misioni i tyre mbaroi në atë akt madhor historik që kryen. Kjo nuk ndodhi me PD. PD, me gjithë tronditjet e mëdha që pësoi përsëri mbeti forcë kryesore politike e vendit. Ajo kishte raste, periudha, shumë herë më të vështira se simotrat e saj në vendet ish-komuniste, në të cilat ajo mund të përfundonte në arkivat e historisë. Kjo nuk ndodhi, nuk ndodhi para së gjithash, para idealeve fisnike të burrave e grave, të rinjve e të rejave, idealeve të shtresës së të përndjekurve politikë që kishin sakrifikuar mijëra jetë për idealet më të larta njerëzore” – tha Berisha.
Ai më tej u shpreh se sot kemtohet përvjetori i themelimit të PD në Durrës e mbarë Shqipërisë, si një opozitë vigane, si një opozitë që ka rikthyer në themelet e saj vlerat më të arrira, rikthejmë liritë dhe të drejtat e qytetarëve, riktheu ato vlera që çdo shoqëri e lirë i ka mbrojtur, i ka ruajtur, i ka përcjellë nga brezi në brez.
“Ne kremtojmë sot përvjetorin e themelimit të PD në Durrës e mbarë Shqipërisë, si një opozitë vigane, si një opozitë që ka rikthyer në themelet e saj vlerat më të arrira, rikthejmë liritë dhe të drejtat e qytetarëve, rikthejmë familjen dhe vlerat e saj, rikthejmë atdhetarinë dhe patriotizmin, riktheu ato vlera që çdo shoqëri e lirë i ka mbrojtur, i ka ruajtur, i ka përcjellë nga brezi në brez. Sot ne jemi të lirë, sepse pavarësisht nga regjimi i krimit, pavarësisht nga dhuna e presoni, ne vendosëm këtë vjeshtë të ngrihemi si njerëz të lirë. Ne vendosëm t’i themi Edvin Ramës se mos luaj me opozitën, shumë shpejt do e provosh se sa do të paguash me lojën tënde me pluralizmin dhe opozitën shqiptare. Unë do ta mbyll fjalën time duke falënderuar edhe njëherë shumë përzemërsisht themeluesit. Forca politike e themeluar në dhjetor të ’90 është më e fortë e më e fuqishme se kurrë në ekzistencën e saj” – tha Berisha.
Discussion about this post