Bllokimi i dy pikave të kalimit kufitar në veri të Kosovës ka hyrë në ditën e tij të pestë. Mediat e Kosovës shkruajnë se gjatë natës serbët lokalë janë përkujdesur për të shtuar numrin e mjeteve të rënda. Në anën tjetër pjestarë të Njësisë Speciale të Kosovës po qëndrojnë në gjendje gatishmërie që nga mbrëmja e djeshme.
Pavarësisht shiut e temperaturave të ulëta të një nate më parë, mëngjesi i gjeti përsëri në kufi serbët dhe efektivët e Kosovës, po pa u regjistruar asnjë incident.
Qeveria e Kosovës mëngjesin e të hënës nisi zbatimin e reciprocitetit për targat duke vënë të përkohshmet për veturat e Serbisë që futen në territorin e Kosovës. Kjo gjë nuk u prit mirë dhe e tensionoi shumë situatën në veri të vendit ku qytetarët serbë në shenjë proteste bllokuan rrugët në Bërnjak dhe Jarinjë.
