Kryeministri i Spanjës dhe presidenti i Kolumbisë u takuan të enjten, ku të dy shprehën shpresat e përbashkëta për një “pikë kthese” në lidhjet midis Amerikës Latine dhe BE-së.
Të dy rajonet janë të vendosur për një “ndryshim në marrëdhëniet politike dhe ekonomike”, tha Gustavo Petro i Kolumbisë, duke iu referuar një samiti të ardhshëm të korrikut në Bruksel midis krerëve të shteteve në BE dhe Komunitetit të Shteteve të Amerikës Latine dhe Karaibeve (CELAC) – e para që nga viti 2015.
“Konteksti sot është shumë i ndryshëm. Kjo nënkupton se ky nuk do të jetë thjesht një takim tjetër, por një ndryshim në marrëdhëniet politike dhe ekonomike midis dy rajoneve,” tha Petro gjatë një konference të përbashkët shtypi me Kryeministrin Pedro Sanchez.
Udhëheqësit diskutuan “potencialin e madh” të Amerikës Latine për energjinë e gjelbër dhe nevojën për të lëvizur përtej prodhimit të lëndëve të para. Në vend të kësaj, Kolumbia dëshiron të krijojë një “partneritet për të krijuar një botë më produktive dhe të begatë”.
Javën e kaluar, Sanchez u takua me presidentin e Brazilit dhe të dy shprehën optimizëm për arritjen e një marrëveshjeje të tregtisë së lirë midis Evropës dhe Amerikës Latine në muajt e ardhshëm.
PRESIDENCA SPANJOLLE E BE, OBJEKTIV THELLIMI I LIDHJEVE ME AMERIKËN LATINE
Në korrik, Spanja do të marrë presidencën e rradhës të Këshillit të BE-së. Një nga qëllimet kryesore të saj është thellimi i lidhjeve midis Amerikës Latine dhe Evropës.
“Ne duhet të ndërtojmë një platformë lëshimi për të ndryshuar politikën e BE-së dhe Amerikës Latine dhe Spanja ka një avantazh të madh për sa i përket gjuhës. Do të shohim se si funksionon,” tha Petro.
MARRËVESHJE PËR ARSIMIN POR EDHE LUFTA NDAJ KRIMIT
Dy krerët e krahut të majtë nënshkruan gjithashtu disa marrëveshje dypalëshe për arsimin, luftën ndaj krimit të organizuar, financimin e biznesit dhe mjedisin.
“Kolumbia është një model global përsa i përket biodiversitetit; ne duhet të bashkojmë forcat me ta. Ne ndajmë nevojën për të çuar përpara tranzicionin e gjelbër,” tha Sanchez, duke përmendur thatësirën “shkatërruese” të Spanjës.
NDIHMA NË NEGOCIATAT PËR PAQE
Ai shprehu gjithashtu gatishmërinë e Spanjës për të marrë pjesë në negociatat e paqes të Kolumbisë me grupin rebel të krahut të majtë të Ushtrisë Çlirimtare Kombëtare (ELN).
Udhëheqësit diskutuan gjithashtu hapjen e tyre për rifillimin e dialogut me Nicolas Maduro të Venezuelës për t’i dhënë fund krizës në Venezuelë.
Discussion about this post