Shqipëria mbetet në listën e 75 vendeve për të cilat Departamenti Amerikan i Shtetit ka pezulluar lëshimin e vizave emigracioni, duke argumentuar këtë masë si një mënyrë për të kufizuar përdorimin e ndihmave sociale nga emigrantët që kërkojnë qëndrimin e përhershëm në SHBA.
Eksperti i emigracionit, Lorenc Mansaku, i ftuar në News24, shpjegoi se baza ligjore e pezullimit është garancia financiare I-864, e cila kërkon që personi që bën bashkimin familjar të garantojë se aplikanti do të ketë të ardhura mbi 125% të nivelit të varfërisë. Në rast se aplikanti merr ndihma sociale, shteti amerikan mund t’i kërkojë kthimin e fondeve nga qytetari amerikan ose personi me green card që ka bërë garancinë. Mansaku theksoi se kjo praktikë nuk ka funksionuar për një kohë të gjatë dhe vetëm kohët e fundit USCIS ka filluar të kërkojë dëmshpërblimin e fondeve të përdorura.
Ai shtoi se kriteri i përdorur nga administrata amerikane për përfshirjen e vendeve në listë është përqindja e keqpërdorimit të ndihmave sociale nga qytetarët e atyre vendeve, duke përfshirë Shqipërinë, Kosovën, Maqedoninë dhe Malin e Zi. Mansaku theksoi se shqiptarët janë të ndërgjegjshëm dhe shumë prej tyre po kontaktojnë ekspertët për të kuptuar detyrimet ligjore që u lindin për garancinë financiare.
Ambasada amerikane në Tiranë ka sqaruar se pezullimi përfshin vetëm vizat emigracioni, për qëndrim të përhershëm, ndërsa vizat turistike dhe studentore vazhdojnë të lëshohen. Mansaku shpjegoi se proceset e bashkimeve familjare vazhdojnë normalisht deri në ditën e intervistës, por vizat nuk do të lësohen deri në një udhëzim të dytë, duke krijuar një pezullim praktik të procedurave.
Eksperti shtoi se kjo gjendje krijon periudha ankthi për shqiptarët që presin Green Card, pasi nuk ka një datë të përcaktuar për rifillimin e lëshimit të vizave, ndërsa disa masa të reja, si vendosja e një garancie publike prej 1,000 dollarësh për vizat emigracioni, po shqyrtohen si zgjidhje e mundshme.
Sipas Mansakut, ka edhe sfida juridike ndaj pezullimit, pasi organizatat për të drejtat civile kanë depozituar padi federale duke e konsideruar masën të pabazuar dhe diskriminuese. Ai shtoi se proceset e intervistave mund të vazhdojnë për të shmangur krijimin e një volumini të madh të aplikimeve, por lëshimi i vizave mbetet pezull për vendet e prekura, duke përfshirë Shqipërinë.
gijotina.com/
Discussion about this post