Edhe pse Gjykata Kushtetuese ka vendosur pezullimin e dekretit presidencial për mbajtjen e zgjedhjeve në Bashkinë e Tiranës më 9 nëntor, kjo nuk i ka ndalur dy forcat kryesore politike në vend, PS dhe PD, të cilat po vijojnë punën në terren me strukturat dhe mbështetësit e tyre.
Partia Socialiste, sipas burimeve nga selia rozë, u ka kërkuar strukturave në kryeqytet të mos ndalin asnjë aktivitet, duke theksuar se vendimi i Kushtetueses nuk përbën anulim, por pezullim të dekretit deri më 31 tetor, kur pritet të merret vendimi përfundimtar për vlefshmërinë e tij.
Në një mesazh zyrtar drejtuar strukturave të PS-së në Tiranë thuhet:
“Sikurse u theksua edhe mbrëmë, vendimi i sotëm nuk i prek zgjedhjet e 9 nëntorit. Vendimi përfundimtar i Gjykatës do të jepet më 31 tetor.”
Burime nga brenda PS-së thonë se organizimi në terren nuk do të ndalet, dhe të gjitha takimet e planifikuara do të zhvillohen si normalisht, për të ruajtur moralin elektoral dhe përgatitjen logjistike në rast se votimi zhvillohet.
Edhe Partia Demokratike, që për garën në Tiranë po mbështet kandidatë të pavarur në kuadër të një koalicioni të gjerë opozitar, ka konfirmuar se do të vijojë mobilizimin dhe kontaktet me qytetarët, duke e konsideruar vendimin e Kushtetueses si një fazë teknike, jo politike.
Megjithatë, nga pikëpamja praktike, mbajtja e zgjedhjeve më 9 nëntor duket gjithnjë e më pak e realizueshme. Vendimi i Gjykatës Kushtetuese, i cili pritet të botohet së shpejti në Fletoren Zyrtare, ndalon Komisionin Qendror të Zgjedhjeve të vijojë përgatitjet për procesin: nuk mund të regjistrohen parti, koalicione apo kandidatë, të ngrihen komisione votimi apo të përgatitet logjistika zgjedhore, përfshirë edhe printimin e fletëve të votimit.
Në pritje të 31 tetorit, situata mbetet pezull, ndërsa partitë përpiqen të ruajnë ritmin elektoral dhe të mbajnë strukturat “në gatishmëri”.
Discussion about this post