Prej muajsh çmimet e karburantit në vendin tonë kanë pësuar rritje të ndjeshme. Për qytetarët kjo është një kosto e papërballueshme, por asnjë masë nuk është marrë nga instancat përkatëse. Qeveria, vetëm sa ngriti një Bord Transparence me idenë se do të rregullojë çmimet në treg, por në fakt po i rrit edhe më shumë. Ndërkohë, Autoriteti i Konkurrencës nisi 3 javë më parë një hetim për “NOA CONTROL”, koncesionarin që menaxhon pompat e karburantit. Sakaq, ditën e djeshme Konkurrenca ka publikuar vendimin e marr pas këtyre hetimeve, duke na lënë të kuptohet se po fsheh abuzimin që bëhet me çmimet në vend. Kjo, pasi Konkurrenca ka dalë në përfundimin se nuk ka pasur asnjë shkelje të koncesionarit që menaxhon pompat e naftës. Madje theksohet se kompania përgjegjëse nuk ka ndikuar aspak në vendosjen e çmimit të karburanteve. Ndërsa kujtojmë se në të vërtet, sipas kontratës, kjo kompani ka ndikim edhe në shitjen e karburanteve me pakicë.
“Në përfundim të procedurës hetimore, nuk u evidentuan shenja të kufizimit të konkurrencës nga ana e ndërmarrjes NOA CONTROL SHPK në ofrimin e shërbimit të verifikimit të instrumenteve shpërndarëse të karburantit dhe GLN-së, në kuptim të nenit 9 të ligjit nr. 9121/2003.
Për këto arsye, Komisioni i Konkurrencës mori Vendimin nr. 884, datë 18.05.2022, nëpërmjet të cilit vendosi mbylljen e procedurës së hetimit paraprak dhe detyrimin e ndërmarrjes NOA CONTROL SHPK, si një ndërmarrje me të drejta të veçanta, që gjatë ushtrimit të aktivitetit të saj të respektojë parimet dhe rregullat e konkurrencës, veçanërisht parashikimet e nenit 9 të ligjit nr. 9121/2003 “Për mbrojtjen e konkurrencës””, thuhet në vendim.
E vetmja pikë që AK ka tërhequr vëmendjen është se duhet të rishikohet metodologjia e ndryshimeve të tarifave që ofrohen nga Koncesionari. Pra, nëse kjo metodologji nuk është e duhur kjo do të thotë që në një farë formë ka ndikuar në çmimet e naftës, për derisa koncesionari propozon tarifa të ndryshme. Por, Konkurrenca nuk ka preferuar ta sqarojë këtë pikë, madje po tenton të fsheh kështu të gjitha shkeljet që një muaj më parë Kontrolli i Lartë i Shtetit i gjeti koncesionarit të pompave.
Çfarë zbuloi KLSH
Në një raport të publikuar së fundmi nga KLSH evidentohet se kontrata e koncesionarit e lidhur nga qeveria ka shumë mangësi dhe është zhvilluar në shkelje të ligjit. Madje ka cekur se, nuk bën punën si duhet për kontrollimin e pompave të karburantit dhe kështu janë krijuar hapësira për abuzime. Konkretisht, KLSH ka thënë se kontrolli për pompat e gazit dhe naftës nuk bëhet sikur duhet pasi mungojnë ekspertët metrologë, por gjithsesi qeveria vazhdon ta paguajë koncesionarin për këtë shërbim, që nuk jepet kurrë. KLSH ka treguar se shpenzimet që do të bëhen për shërbimet metrologjike që do të ofrohen prej DPM për 10 vitet në vazhdim, do të jenë mesatarisht rreth 130 milion lekë në vit. Nga të dhënat bie në sy se vlera që paguhet me taksat tona për këtë koncesionar kap shifra marramendëse, ndonëse për shkak të abuzimit të tij nga ana tjetër përballemi edhe me çmime të kripura të karburanteve.
Këtu lind pyetja se, cili nga këto dy autoritete kontrolluese, që kanë si detyrim të rrisin transparencën dhe të eliminojnë shkeljet ka të drejtë? Nëse qeveria merret me Bordin që po i ngre çmimet gjithmonë e më shumë dhe institucionet e tjera përgjegjëse luajnë “ping-pong”, kush vallë po merret me rregullimin e këtij kaosi që ka përfshirë vendin? Askush, e gjithë kjo është një skemë me direktiva të qeverisë dhe barra mbetet mbi qytetarët.
Discussion about this post