Milan këtë të martë do të përballet me Liverpoolin për të siguruar kualifikimin në fazën tjetër të UEFA Champions League.
Liverpooli i Jurgen Klopp e ka siguruar tashmë kualifikimin, duke fituar të pesta ndeshjet në fazën e grupeve, ndërsa Milani do të kërkojë me çdo kusht fitoren në ‘San Siro’ për ta kaluar Grupin B.
Nga ana tjetër italianët duhet të jenë edhe me fat, duke shpresuar që Porto mos të arrijë triumfin në këtë fazë të grupeve.
Jurgen Klopp ka deklaruar se do të bëjë rotacion në këtë sfidë, ku premtoi se do ti japë minutat e nevojshme shumë lojtarëve të rinj, dhe pikërisht ky element ka shtuar dozat e optimizmit te Milani.
“Jemi më të fortë se në ndeshjen e parë. E dimë nivelin e intensitetit dhe forcës së Liverpoolit. Nëse do të arrijmë që të kalojmë presingun e parë të tyre mund të jemi të rrezikshëm edhe ne. Po punojmë në detajet minimale, sepse duam që të jemi konkurrues me më të fortët e Evropës”, ka deklaruar Pioli.
“Jemi të bindur që jemi të fortë dhe që Liverpooli është shumë i fortë. Duam që të përballemi me skuadrat më të forta dhe të kërkojmë të fitojmë me sakrificë, vendosmëri dhe qartësi teknike e taktike”.
“Mendojmë vetëm për ndeshjen e nesërme. Objektivi ynë është që të jemi konkurrues në Itali dhe në Evropë. Nëse kualifikohemi në 1/8 e finales shumë mirë, në të kundërt do të japim gjithçka në Ligën e Evropës. Duam të shohim nivelin tonë”, mbylli Pioli
Discussion about this post