Milani i vendit të parë përballet nesër në mbrëmje me skuadrën e Bologna dhe trajneri Stefano Pioli e vlerëson maksimalisht kundërshtarin e radhës. “Do të jetë një ndeshje e vështirë, më vjen keq që Mihajlovic nuk do të jetë në pankinë, por ai ka treguar se mund të kalojë vështirësitë dhe skuadra e tij reflekton këtë karakteristikë.
Na duhet qartësi, duhet të kuptojmë kur duhet të sulmojmë me shumë energji dhe kur duhet të mbrojmë me kujdes”, tha fillimisht Pioli, i cili u pyet edhe në lidhje me presionin e vendit të parë në skuadrën e tij.
“Ka tension pozitiv. E dimë që duhet të japim gjithmonë maksimumin, por me dëshirën për t’u argëtuar që na jep mundësinë të luajmë mirë”, shtoi tekniku i Milanit, ndërkohë që në këtë duel pritet që “San Siro” të jetë plot.
“Tifozët janë energji më shumë për ne, ajo që na duhet. Kjo mbështetje duhet të na japë entuziazëm dhe mundësinë për të luajtur në maksimum ndeshjet e mbetura”, vijoi trajneri i kuqezinjve. Ai foli edhe për gjendjen e skuadrës së tij.
“Ibrahimovic është mirë dhe i gatshëm për këtë takim. Kam vetëm një dyshim në mesfushë për formacionin, por jam i qetë sepse janë të rëndësishëm si titullarët edhe ata që futen në lojë më pas. Nuk ka rëndësi se kur luajmë, respektojmë kalendarin. Por duhet të fitojmë ndeshjet tona, pavarësisht këtyre situatave. Nuk fshihemi, duam të fitojmë këto 8 ndeshjet e fundit dhe më pas do të bëjmë llogaritë”.
“Juventus-Inter? Do ta shohim ndeshjen, por më intereson se çfarë bëjmë ne dhe jo ajo që bëjnë të tjerët. Skuadra nuk duhet të ndikohet nga rezultati i sfidës së sotme, rëndësi ka ndeshja jonë”, përfundoi Pioli.
Discussion about this post