Pisha: Dede jep garanci, Elbasanit i mungon…

Për herë të fundit Elbasani ka milituar në Superiore para 10 vitesh. Bëhet fjalë për ekipin tradicional, KF Elbasani, i cili në sezonin 2013-2014 nën drejtimin e Ilirjan Files ngjiti për herë të fundit ekipin në elitë.

Atë sezon nuk munguan as lojtarët me eksperiencë, si Dorian Bylykbashi, Arian Pisha, Elvis Kotorri, Eriol Merxha, Endri Dalipi dhe të tjerë që pranuan të jepnin kontributin në Kategorinë e Parë.

Sot, fiks pas 10 vitesh, qyteti pret rikthimin e skuadrës në Superiore. Kësaj here me AF Elbasanin, që ka thithur elementë me eksperiencë dhe kampionë si dikur. Duket se historia po ripërsëritet pas një dekade, por kësaj here me shpresën se nëse ngjiten në Superiore, të mos jenë thjesht kalimtarë si dikur.

ARIAN PISHA

Një nga titullarët e atij edicioni ishte edhe mbrojtësi Arjan Pisha, që u rikthye në qytetin e tij të lindjes për të dhënë kontributin për skuadrën dhe mbyllur më pas edhe karrierën.

Në një prononcim për “Panorama Sport”, ish-mbrojtësi pohon se aktualisht është e rëndësishme që qytetit po i rikthehet entuziazmi i munguar dhe se skuadra të rikthehet aty ku i takon.

“E rëndësishme është që Elbasani po rikthehet aty ku i takon, pasi bëhet fjalë për një skuadër dhe qytet që i ka munguar elitës së futbollit shqiptar.

Ne ia dolëm para 10 vitesh me plot sakrifica, pasi dihej gjendja e skuadrës. Sot gjërat janë më ndryshe dhe duken në rrugë të mbarë, jo vetëm për t’u ngjitur, por edhe për të vijuar sa më gjatë në Superiore dhe pse jo pretenduar për sa më lart”, u shpreh fillimisht Arian Pisha.

MERKATO

Më tej, në lidhje me merkaton e bërë, ish-mbrojtësi vlerëson afrimet, presidencën dhe punën e trajnerit. “Elbasani është skuadra që ka bërë më shumë merkato deri tani dhe mund të them se janë lojtarë cilësorë.

Janë emra që të gjithë i njohin dhe që kanë milituar në Superiore. Nuk është pak, ndaj kanë vlerësimin maksimal. Eksperienca ka shumë rëndësi në këtë kategori, pasi dihet që ka ndeshje të vështira dhe janë lojtarët me eksperiencë ata që e mbajnë presionin.

Dede është një ishfutbollist që ka fituar shumë në futbollin shqiptar. Edhe në pjesën e trajningut ka bërë mirë dhe jam i bindur se do të dijë të organizojë si duhet edhe skuadrën e këtij sezoni. Nga ana tjetër kanë një president që po financon shumë për ta rikthyer ekipin aty ku i takon.

Me pak fjalë, duket çdo gjë në rregull dhe hallkat që i duhen një klubi për të qenë i suksesshëm funksionojnë”, u shpreh në prononcimin e tij për gazetën, ish-mbrojtësi i njohur në futbollin shqiptar, Arian Pisha./PanoramaSport