Chelsea dhe Ajaxi i Amsterdamit mund të përfshihen në një marrëveshje të zgjuar këtë verë, e cila jo vetëm do të përmbushte nevojat e të dyja klubeve, por edhe do t’i jepte një kthesë të rëndësishme karrierës së sulmuesit shqiptar, Armando Broja.
Sipas raportimeve nga mediet britanike, Chelsea është shumë i interesuar për mbrojtësin holandez Jorrel Hato, një talent i madh i Ajax-it që ka tërhequr gjithashtu vëmendjen e Arsenalit dhe Liverpoolit. Ajax-i kërkon rreth 40 milionë paundë për kartonin e Hato-s, por Chelsea mund të përdorë një “kartë” të fuqishme në negociata: Brojën.
Sulmuesi i kombëtares shqiptare, i cili ka kaluar dy sezone të vështira me dëmtime dhe huazime te Fulhami dhe Evertoni, ka shprehur dëshirën për t’u larguar nga ‘Stamford Bridge’ në mënyrë përfundimtare.
Klube si Milan, RB Leipzig dhe PSV kanë shfaqur interes konkret për të, por së fundmi ka dalë në skenë Ajax-i, që thuhet se ka kontaktuar Chelsea-n për të kuptuar kushtet e transferimit të Brojës.
Një shkëmbim mes Brojës dhe Hato-s mund të jetë një zgjidhje ideale për të dy klubet: Ajax-i do të merrte një sulmues me potencial të madh, ndërsa Chelsea do të përfitonte një mbrojtës të ri premtues pa paguar shumën e plotë.
Për Brojën, kjo do të ishte një mundësi e artë për një rifillim në një ambient që di të kultivojë talentin dhe të ofrojë minuta të rregullta në një ligë konkurruese.
Ky operacion mbetet për t’u parë në javët në vijim, por sinjalet janë pozitive. Ky transferim mund të rezultojë një fitore për të gjithë: për lojtarin, për klubet dhe për tifozët shqiptarë që presin ta shohin Brojën sërish në nivele të larta.
Discussion about this post