Pjesa më e madhe e apartamenteve që janë në shitje në kryeqytet janë dy dhoma e një kuzhinë, megjithëse muajt e fundit po rritet dhe oferta e 1+1.
Keydata, një indeks i hartuar nga Çelësi Media Group, ka analizuar edhe statistikat përshkruese të karakteristikave të pronave në shitje në Tiranë, që përfshijnë: përqindjen e apartamenteve në shitje sipas tipologjisë dhe përqindjen e apartamenteve në shitje sipas gjendjes së apartamentit.
Ndër vite, rreth 60% e apartamenteve në shitje në Tiranë janë të tipologjisë dy plus një, rreth 30% janë të tipologjisë një plus një, rreth 13% janë të tipologjisë tre plus një, rreth 3 % të tipologjisë garsonierë dhe vetëm 1% janë apartamente me më shumë se 3 dhoma.
Në tremujorin e parë dhe të dytë 2021, 28,8% dhe 28,1% e apartamenteve në shitje janë të tipologjisë një plus një; 55,8% dhe 55,9% janë apartamente dy plus një; 10,7% dhe 11,1% janë apartamente tre plus një, 3,5% dhe 2,9% janë garsonierë dhe 1.2% dhe 1.8% janë apartamente të tjera.
Krahasuar me tremujorin e fundit 2020, në këtë gjashtëmujor të parë, përqindja e apartamenteve në shitje të tipologjisë një plus një ka shënuar rritje me 4.21%, përqindja e apartamenteve dy plus një është ulur me 4.52%, përqindja e apartamenteve tre plus një është ulur me 6.03%, ndërsa përqindja e apartamenteve me më shumë se 3 dhoma është rritur me 36.36%.
Në Grafikun 3 është analizuar përqindja e apartamenteve në shitje sipas gjendjes së apartamentit: e parikonstruktuar, e mirë, shumë e mirë dhe e rikonstruktuar, dhe apartament i ri, për periudhën 2005-2020*. Ndër vite, rreth 20% e apartamenteve në shitje në Tiranë janë në gjendje shumë të mirë dhe të rikonstruktuar, rreth 38% janë në gjendje të re, rreth 2% në gjendje të mirë dhe më pak se 1 % në gjendje të parikonstruktuar.
Në gjashtëmujorin e parë 2021, vihet re një dominancë e apartamenteve në gjendje të re (39.6 %), përkundrejt apartamenteve në gjendje shumë të mirë dhe të rikonstruktuar (14.2%), në gjendje të mirë (1.3 %) dhe apartamenteve në gjendje të parikonstruktuar (0.1 %).
Krahasuar me tremujorin e katërt 2020, përqindja e apartamenteve në gjendje të re është rritur me 5.04%; përqindja e apartamenteve në gjendje shumë të mirë dhe të rikonstruktuar është ulur me 16.95%; përqindja e apartamenteve në gjendje të mirë është ulur me 48 % dhe përqindja e apartamenteve në gjendje të parikonstruktuar nuk ka ndryshuar nga njëri tremujor në tjetrin.
Në grafikët e mëposhtëm (Grafiku 4,5 dhe 6) është analizuar lidhja ndërmjet indeksit të çmimit real të shitjes së apartamenteve dhe përqindjes së apartamenteve në shitje në Tiranë sipas tipologjisë: një plus një, dy plus një dhe tre plus një, për periudhën 2005-2021.
Duke qenë se ekonomikisht ekziston një lidhje ndërmjet çmimit dhe kërkesës për apartamente, fluktuacionet e indeksit gjatë viteve kanë ndikuar në përqindjen e apartamenteve një plus një, dy plus një dhe tre plus një. Ndikimi më i madh i indeksit vihet re në apartamentet e tipologjisë një plus një dhe dy plus një, ndërkohë që për apartamentet tre plus një vihet re një qëndrueshmëri përgjatë viteve. Edhe nëse indeksi është rritur ose ulur, përqindja e apartamenteve tre plus një luhatet në intervalin 12-15%.
Për gjashtëmujorin e parë 2021, me rritjen e indeksit, përqindja e apartamenteve të tipologjisë një plus një ka pësuar rritje, përkundrejt tremujorit të fundit 2020. Pra, në këtë tremujor, oferta për apartamente të tipologjisë një plus një, është ndikur nga rritja e nivelit të çmimeve reale të shitjes.
Përsa i përket tipologisë së apartamenteve dy plus një, me rritjen e nivelit të çmimeve vihet re një rënie e apartamenteve në shitje për këtë tipologji, krahasuar me tremujorin e fundit 2020, duke qenë se ajo është një nga tipologjitë më të kërkuara nga një familje tipike shqiptare me 4 anëtarë mesatarisht.
Apartamentet e tipologjisë tre plus një, kanë pësuar gjithashtu rënie, krahasuar me tremujorin e katërt 2020, me rritjen e indeksit të çmimit real të shitjes së një apartamenti në Tiranë./Monitor
