Detaje të reja janë zbardhur për ngjarjen e rëndë që tronditi zonën e Agios Panteleimonas në Athinë të hënën mbrëma, ku një shqiptar u ekzekutua me armë zjarri. Viktima është 47-vjeçari Artur Turabi, i njohur për autoritetet greke dhe me precedentë penalë të mëparshëm.
Sipas mediave greke, Turabi u gjet i shtrirë në tokë me plagë në kokë të shkaktuara nga armë zjarri. Ai ishte arrestuar më parë në vitin 2022 për pjesëmarrje në një organizatë kriminale që kryente vjedhje ndaj pasagjerëve të transportit publik në Greqi.
Artur Bashimi i njohur si “Turabi”, u qëllua për vdekje me armë zjarri në kokë në rrugën “Mihail Voda 200”, në lagjen Agios Panteleimonas të Athinës. Forca të shumta policie rrethuan vendin e ngjarjes dhe hetimet për zbardhjen e plotë të rrethanave vazhdojnë.
Sipas mediave greke, i ndjeri është vëllai i Marsel Bashimit, i njohur gjithashtu me mbiemrat Shkurtaj dhe Gozhita, emër i përfshirë në disa dosje kriminale në Greqi dhe Shqipëri. Marsel Bashimi u arrestua në korrik 2022 së bashku me Bledar Jambellin dhe Kristaq Lecin, të dy të akuzuar për vrasjen e komisarit të policisë Artan Cuku.
Artur Bashimi kishte precedentë penalë, përfshirë arrestime për vjedhje dhe përfshirje në organizata kriminale. Ai u arrestua në shkurt 2022 si pjesë e një grupi që kryente grabitje në transportin publik dhe sërish në prill 2024 për akuza të ngjashme. Hetimet po verifikojnë nëse ekzekutimi i tij ka lidhje me aktivitetin kriminal të familjes dhe konfliktet me grupe të tjera.
Në vitin 2017, Bledar Jambelli planifikoi vrasjen e ish-Drejtorit të Policisë Vlorë, Artan Cuku, duke bashkëpunuar me Kristaq Leçin. Një shtetas u pagua 20.000 euro dhe iu premtua largimi në Gjermani pas kryerjes së krimit. Viktima u qëllua të paktën 8 herë dhe humbi jetën në vendngjarje. Autori nënshkroi më pas marrëveshje bashkëpunimi me drejtësinë.
Discussion about this post