Vëllezërit Taulant dhe Granit Xhaka kanë qenë pjesë e së njëjtës skuadër, Baselit, por shpesh edhe kundërshtar në klube e Kombëtare.
Megjithatë duket se ata kanë dëshirë që të luajnë sërish bashkë në të ardhmen. Madje së fundmi Taulant Xhaka është shprehur se pranë fundit të karrierës së tij, Graniti do të kthehet që të luajë për disa vite te Bazeli, klub nga i cili mesfushori i Kombëtares shqiptare nuk ka ndër mend të lëvizë.
“Nëse Graniti do të jetë 32 apo 33 vjeç, ai padyshim që do të dëshirojë të kthehet edhe një herë te Bazeli, edhe qoftë për një vit. Ne do të dëshironim të luanim përsëri bashkë në këtë stadium. E nisëm bashkë këtu dhe do të dëshironim që ta mbyllnim këtu”, -u shpreh Taulanti në një intervistë për mediat zvicerane.
Megjithatë kush do ta mbajë fanellën me numrin 34, të cilin të dy vëllezërit e kanë prej vitesh në klubet përkatëse? “Unë ia kam thënë Granitit. Ai ka luajtur vetëm dy vite këtu, unë kam luajtur pak më shumë, ndaj jam në avantazh të qartë”, -tha ndër të tjera 30-vjeçari./Gijotina.com
