Një ditë më parë Gijotina.com raportoi mbi tenderin, ku firma Kthella SHPK, në pronësi të Pjetër Nikollit, kishte përfituar tenderin 1.8 mln euro nga Niko Peleshi. Bëhej fjalë për asfaltimin e sheshit të një baze ushtarake në Bizë.
Por kompania e Nikollit ka një gjeografi të zgjeruar të zyrave ku është favorizuar për të përfituar fonde përmes prokurimeve. Në listën e këtyre rasteve së fundmi është shënuar tenderi i Bashkisë Selenicë që ka si objekt ‘Përmirësimi i Rrugës Dhe Rrugicave Me Beton’.
Në dokument thuhet se ky tender zhvillohet në bashkëpunim me FSHZH, prandaj edhe kryetari Nertil Bellaj nuk është kursyer fare, por ka lënë në dispozicion 183 milionë lekë.
Dhe ky fond i majmë është dhënë nga Bellaj pa garë, me një konkurrent të vetëm. Në dokumente shohim që vetëm firma Kthella sh.p.k kishte dorëzuar një ofertë me vlerë 166 milionë lekë. Në këto raste gara duhet të anulohet për shkak të mungesës së konkurrencës, që duhet të rezultojë me kursim të fondit dhe të garantohet cilësi më e lartë.
Për këtë abuzim të hapur, Open Data Albania i ka vendosur Flamurin e Kuq, që është shenja e riskut të korrupsionit.
Ky beton që po blen kryetari Bellaj parashikohet të hidhet në rrugët e 3 fshatrave të Selenicës. Më konkretisht do të shtrohen nga dy rrugica në fshatrat Vajzë, Treblovë dhe Drashovicë.
Nga foto më sipër shohim se bëhet fjalë për disa rrugica të ngushta lagjeje në këto fshatra dhe për 6 rrugica në total, që sipas Bellajt nevojiten 183 milionë lekë. Siç ndodh rëndomë, këtyre rrugëve do t’u hidhet pak asfalt sipër dhe dimrin e ardhshëm prishen sërish. Por, sipas projektit rrugët duhen mbushur me çakull dhe t’u hidhet nga 10 cm beton.
Nuk flitet për trotuare, as për ndriçim dhe kanalizime dhe as për zgjerim rrugë, investime që do të justifikonin këtë fond të madh. Ndërkaq, banorët në këto fshatra janë shprehur se shumë lagje të tjera brenda fshatrave kanë rrugë të amortizuara, por deri më tani askush nuk është kujtuar për to dhe as nuk përfshihen në planet e këtij tenderi.
Pra, kryetari Bellaj po shtron disa rrugica për fasadë, ndërkohë që fondi kënaq kompaninë me bazë në Mirditë, që me siguri i ka ardhur me porosi nga “lart”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post