Identifikohen nga policia dy autorët për plagosjen e Aleksandër Nikollit dhe Xhulio Velës pasditen e kësaj të mërkure në Tiranë. Emrat nuk janë bërë publik ende për mediat ndërsa policia ka ngritur pika kontrolli për kapjen e tyre. Nga hetimet e deritanishme dhe dëshmisë së banorëve që kanë qenë aty në momentin kur ndodhi përplasja me armë zjarri mësohet se autorët kanë qenë dy. Pasi hapën zjarr jashtë lokali ata janë larguar me motorë, por policia ka arritur që t’i identifikojë.
Pista kryesore për këtë ngjarje dyshohet të jetë prishja e pazareve për shkak të trafikut të drogës. Të plagosurit, Nikolli dhe Vela, 27 dhe 25 vjeç rezultojnë se janë me precedent penal dhe të skeduar më herët nga policia për trafik narkotikësh. Vela është arrestuar për të njëjtën arsye edhe në Itali, një vit më parë.
Kujtojmë se ngjarja ndodhi rreth orës 17:00 pasditen e sotme. Fillimisht të rinjtë u konfliktuan në një lokal, por sherri u zhvendos në rrugë ku u përdorën dhe armët e zjarrit. Plumbat kapën Nikollin e Velën, të cilët janë në spital jashtë rrezikut për jetën.
