Plagoset me armë zjarri një 16-vjeçar, ja ç’thotë policia

Një 16-vjeçar ka mbetur i plagosur me armë zjarri, ndërsa Policia ka shpallur në kërkim autorin e dyshuar të krimit, një 18-vjeçar.

Ngjarja ka ndodhur në Kamëz, ku sipas raportimeve 18-vjeçari A.H, gjatë një konflikti për motive të dobëta, ka plagosur me armë zjarri 16-vjeçarin.

Njoftimi nga Policia

Shërbimet e Komisariatit të Policisë Nr. 5, ditën e sotme, pas marrjes së njoftimit se në rrugën “OSBE”, në Kamëz, një shtetas ka plagosur me armë zjarri një 16-vjeçar, menjëherë kanë organizuar punën për identifikimin e autorit të dyshuar.

Si rezultat i veprimeve të shpejta hetimore u bë identifikimi i autorit të ngjarjes, shtetasit A. H., 18 vjeç, i cili gjatë një konflikti për motive të dobëta, ditën e sotme, rreth orës 16:10, ka plagosur me armë zjarri në këmbë, një 16-vjeçar.

16-vjeçari si pasojë është dëmtuar dhe ndodhet në spital, nën kujdesin e mjekëve.

Vijon puna për kapjen e autorit të dyshuar.

Materialet do ti kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.