Gjykata e Tiranës ka lënë në burg shtetasin Qani Muça, që pak ditë më parë qëlloi me armë punonjësin e IMT-së Ilirjan Gavelli. Ky i fundit u plagos me armë zjarri pasditen e së premtes nga 52-vjeçari Qani Muça, pasi kishte ekzekutuar një vendim për prishje objekti.
Në momentin kur ka ndodhur plagosja, autori dyshohet të ketë qenë i dehur, ndërkohë policia sekuestroi dhe armën e përdorur, tip TT. Ngjarja ndodhi më rrugën Todi Shkurti dhe ndaj autorit u ngrit akuza “Vrasja në rrethana cilësuese e mbetur në tentativë”. Në momentin e arrestimit, autori Qani Muça mësohet të jetë shprehur: Këta të IMT-së duhen vrarë të gjithë sepse janë kriminelë.
Në gjykatë Muça ka pretenduar se arma nuk ishte e tij, por e punonjësit të IMT-së. Sipas tij, konflikti ka lindur pas provokimit të inspektorit, që i ka thënë se “nuk deshe të marrësh hyrje, rri mes 4 rrugëve tani”.
Ndërkohë Muça ka pretenduar se punonjësit e IMT-së i kanë vjedhur edhe rreth 80 mijë euro, që i ka pasur të fshehura në godinë. Ndërkohë në dëshminë e tij për policinë, Gavelli kishte deklaruar se kishte tentuar t’i hiqte pistoletën nga dora dhe në këtë moment arma është shkrepur dy herë.
“Unë instiktivisht jam hedhur dhe ja kam kapur pasi isha në distancë 2-3 metra larg tij. Në momentin që i kam kapur armën, ai e ka shkrepur dhe kam ndjerë që plumbi më preku në pjesën e barkut. Kam vazhduar të përleshem me të për t’i hequr pistoletën, por mesa mbaj mend pistoleta ka shkrepur për herë të dytë, ndërsa unë vazhdoja ta mbaja të bllokuar nga duart”.
Discussion about this post