Plagosja e 24-vjeçarit Markeljan Pepës, e cila ndodhi më 8 gusht, nuk ka vënë asnjë autor në pranga të policisë. ‘Faxnews’ raporton se i riu ndodhet ende i shtruar në Spitalin e Traumës, në gjendje jo të mirë shëndetësore. Mësohet se i riu rrezikon të humbasë njërën veshkë ndërsa ka marrë dëmtime serioze në të dyja. Pepa pretendon se nuk i njeh autorët, dhe se policia ka qenë hermetike sa i përket bashkëpunimit me familjarët e tij.
Ai thotë se në zonën ku ka ndodhur ngjarja, ka kamera sigurie që mund të zbërthenin dinamikën e ngjarjes por në informacionet që ka, nuk kanë qenë funksionale. Familjarët e Markelianit po ashtu nuk e dinë se kush kanë qënë autorët, mirëpo janë dyshues nëse kamerat e sigurisë funksiononin apo jo.
“Çfarë ka ndodhur ne e dimë në bazë të thënave. Nuk dimë as se kush ka qenë as nuk kemi informacion nga policia. Ne dimë se në vendin që ka ndodhur ka plot kamera. Por me sa informacion na kanë dhënë, kamerat nuk kanë qenë në punë. Të paktën ky është informacioni që kemi marrë nga policia. Sa është e vërtetë ne nuk e dimë. Tani e vetmja gjë që na intereson për momentin është që të shërohet Markeliani. Është i dëmtuar në dy veshkat dhe organe të tjera. Ka gjak në veshka, është i intubuar për shkak se ka probleme edhe me frymëmarrjen. Ka qenë në shëtitore me shokë, nuk e di saktësisht çka ndodhur, se jam lodhur pasi është rëndë me shëndetin dhe e kemi menduar ta diskutojmë në një moment të dytë.
I riu ka qenë me disa shokë, për një moment është ndarë prej tyre për të blerë diçka dhe është sulmuar nga një grup djemsh. I afërmi i Markeljanit flet edhe për precedentët e 24– vjeçarit në të kaluarën.
“Ata kanë qenë 7 veta. Markeljani, ka qenë me shokë, por ka qenë ndarë prej tyre, ka vajtur në një kioskë për të marrë disa birra dhe kur ka dalë nga lokali është sulmuar. Shansi që ka qenë nga ana e djathët goditja se do e kishte kapur në zemër. Pecedenti që ka pasur Markeliani daton shumë vite më parë, siç e kanë të rinjtë, ka qenë minoren ka qëlluar në mal me shokë në ajër, është hetuar dhe gjykuar për atë ngjarje. Në Shëngjin ka qenë me pushime, punon në një kompani private në Mirditë dhe s’ka pasur asnjë problem në të shkuarën.’– kanë treguar më tej familjarët.
Plagosja e Markeljan Pepës ndodhi mbrëmjen e 8 gushtit në Shëngjin. Ai u sulmua nga disa persona në bregdet e më pas sherri mes tyre vazhdoi dhe në shëtitore aty ku u sulmua me thikë.
