Zbardhet dëshmia e 38-vjeçarit Lulzim Rakajt e dhënë në Policinë e Shkodrës, i cili akuzohet për plagosjen e dyfishtë të regjistruar ditën e djeshme në Malësi të Madhe ndaj Besmir Çofit dhe Avenir Hasanajt.
Rakaj ka deklaruar se ka qëlluar në drejtim të dy shtetasve pas një konflikti që ka patur nipi i tij dhe duke dyshuar se Besmir Çofi dhe Avenir Hasanaj ishin të armatosur.
“Pak ditë më parë dy personat që kam plagosur kanë goditur nipin tim duke e rrahur. Nuk e di se çfarë konflikti kanë pasur por di që më kanë goditur nipin i cili më tregoi për ngjarjen e ndodhur. Unë shkova për të folur me ta dhe aty nisi debati. Dyshova se njëri prej tyre kishte armë zjarri ndaj duke menduar se mund të më vrisnin qëllova ndaj tyre”, mësohet të ketë thënë në dëshminë e tij i arrestuari Lul Rakaj.
Ngjarja ndodhi një ditë më parë në rrethrrotullimin e Grikës në Malësinë e Madhe në hyrjen e një lokali. Lul Rakaj dyshohet se qëlloi 8 herë me armë zjarri në drejtim të Besmir Çofit dhe Avenir Hasanaj duke i lënë të plagosur.
Hasanaj mori një plumb në gjoks dhe ishte në gjendje të rëndë shëndetësore. Pas operacionit në spital kaloi rrezikun për jetën.
Lul Rakaj u arrestua pas 3 orësh ndekje nga RENEA, teksa u kap në afërsi të ballkonit panoramik të Tamarës në Malësinë e Madhe, teksa në automjet ndodhej bashkë me bashkëshorten e tij.
Arma e zjarrit pistoletë nuk është gjetur ende dhe policia po punon për ta gjetur dhe sekuestruar si provë.
Lulzim Rakaj në vitin 2004 ka vrarë shtetasin Kolë Gjokaj duke u hakmarrë për babain e tij të vrarë nga vëllai i Kolë Gjokaj më përpara. Pas afro 15 vitesh burg Lul Rakaj u lirua duke u përfshirë në këtë tenativë vrasje me dy të plagosur.
Discussion about this post