Kanë dalë detaje të reja lidhur me plagosjen e dyfishtë që ndodhi ditën e djeshme në ish-parkun e Autobusëve në Tiranë, ku mbetën të plagosur Aleksandër Nikolla dhe Xhulio Vela. Të arrestuarit e kësaj ngjarje janë Farjon Palushi dhe Daniel Manushi, si dhe është shpallur në kërkim Islam Xhetani, të tre këta emra me precedent të mëparshëm penal.
Aleksandër Nikolla, pra një prej të plagosurve, është arrestuar pasi akuzohet se nuk ka treguar identitetin e personave që i kanë qëlluar. Raportohet se gjendja shëndetësore e dy të plagosurve është e qëndrueshme dhe jashtë rrezikut për jetën. Sakaq, vlen të përmendet se Daniel Manushi dhe Farjon Palushi nuk ishin emra të panjohura për policinë.
Daniel Manushi njihet si tip problematik, rezulton me nënshtetësi gjermane pasi ka lindur në këtë shtet dhe herë pas here udhëtonte drejt këtij vendi.
27-vjeçari është me precedent penal, pasi 4 vite më parë qëlloi me armë zjarri duke plagosur një efektiv policie, të komisariatit nr. 1, i cili në momentin që u godit ishte jashtë shërbimit. Daniel Manushi më 28 nëntor 2017 qëlloi dhe plagosi agjentin e krimeve Ermal Bregu.
Agjenti Bregu asokohe dëshmoi se ngjarja kishte ndodhur për shkak të një konflikti banal mes tyre. Sipas tij, Manushi i kishte thënë “pse më sheh” dhe nga aty kishte nisur debati që përfundoi me plagosje.
Ndërsa Fatjon Palushi është arrestuar në operacionin e qershorit të Komisariatit nr. 2 për prodhim dhe shitje të narkotikëve, ku u prangosën në total 12 të rinj të zonës së ish-Parkut të Autobusëve. Palushi ishte pjesë e grupit që merrej me shitjen dhe shpërndarjen e lëndëve narkotike në zonën e ish-Parkut, në rrugën “Ndre Mjeda” dhe “Frosina Plaku”. Në këtë rast Palushi u la në “arrest shtëpie”.
Shkak i ngjarjes së djeshme në Tiranë dyshohet se ka qenë një sherr i momentit, por nuk përjashtohet as mundësia për çështje droge.
