Policia greke po vijon një operacion nga deti dhe toka për kapjen e autorit të plagosjes së Andrea Kalemit, 51-vjeçarit shqiptar, ndaj të cilit u qëllua me 10 plumba.
Kalemi ndodhet në gjendje të rëndë shëndetësore, ndërsa dyshohet se autori i krimit është një tjetër shqiptar, i cili ka mbërritur në Greqi nga Italia.
Autoritetet greke kanë nisur një operacion të gjerë kontrolli për të gjitha mjetet lundruese që dalin nga ishulli Paxos me drejtim Prevezen, Igumenicën dhe Korfuzin.
I plagosuri Kalemi, kushëri i Aleksandër Sadikajt, është transportuar me skaf nga Paxos në limanin Arila, Perdika dhe më pas me autoambulancë drejt Janinës.
Kalemi rezulton të jetë një emër i njohur për policinë shqiptare dhe jo vetëm. Kjo pasi, drejtësia belge kërkonte burgosjen e tij në vitin 2001, kohë kur së bashku me vëllain e tij, Fatmir Kalemi, akuzohej se kishte ekzekutuar në Anderleht vëllezërit shqiptarë Mevlan e Adriatik Çaça.
Pikërisht në vitin 2001, Kalemi rezulton i arrestuar nga forcat speciale RENEA.
Më pas në vitin 2017 ai është arrestuar në Tiranë së bashku me 2 persona të tjerë pasi kanë kundërshtuar me forcë efektivet e policisë, teksa ishin nën efektin e alkoolit. Sakaq, një person i katërt që ishte në shoqërinë e tyre goditi me shufër hekuri në kokë punonjësin e policisë me iniciale E. V., i cili përfundoi asokohe në spital.
Ndërkohë, në vitin 2022 emri i Kalemit doli sërish në dritë, pasi një shpërthim i komanduar me eksploziv, i mori jetën kushëririt të tij Aleksandër Sadikaj, pranë rreth rrotullimit të TEG-ut në kryeqytet.
Një seri ngjarjesh që lidheshin me atentatin pasuan dhe më e rënda ishte vrasja e biznesmenit Edmond Papa, si shenjë hakmarrje për shpërthimin që i mori jetën të riut Sadikaj.
Pas hekurave për vrasjen e Papës ndodhet miku i Andrea Kalemit, Albano Velo, i cili u arrestua nga autoritetet ndërsa në kërkim është shpallur një tjetër shok i tij, i identifikuar si Andreë Bode.
Në dosjen hetimore për vrasjen e Papas përmendet edhe emri i Kalemit. Sakaq, Andrea Kalemi rezulton të jetë edhe biznesmen, pasi emri i tij del si bashkëpronar i kompanisë “Shiza Kalemi” sh.p.k me adresë në Memaliaj. Kjo kompani sipas ekstratit të QKB-së operon në disa fusha.
Discussion about this post