Dy persona janë arrestuar lidhur me plagosjen e trefishtë të ndodhur orët e para të kësaj të marte, në një lokal në Tiranë, te zona e “Delijorgjit”. Personat e vënë në pranga akuzohen se kanë fshehur armën me të cilën ka qëlluar 32-vjeçari Edison Elezaj, djali i biznesmenit të ujit “Lajthiza”, Hajri Elezaj.
Policia po ashtu ka ndryshuar qëndrim lidhur me akuzën. Në njoftimin paraprak blutë thanë se i riu “dyshohet se aksidentalisht, ka bërë shkrepje të pavullnetshme të armës që mbante pa leje”.
Ndërsa në një njoftim të dytë, policia e Tiranës thotë se plagosja ka qenë me dashje dhe ka ngritur ndaj 32-vjeçarit akuzën për veprën penale “Plagosja e rëndë me dashje“.
Dy personat e vënë në pranga janë Arjan Dushaj, 38 vjeç, dhe Dardan Zalli, 35 vjeç, të dy banues në Tiranë, të akuzuar për veprën penale “Veprime që pengojnë zbulimin e së vërtetës”, kryer në bashkëpunim.
“Gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes. Pas kryerjes së krimit nga shtetasi E.E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj”, thotë policia në një njoftim për mediat.
Nga qitja e armës u plagosën tre persona, një 36-vjeçare, një 36-vjeçar dhe një 34-vjeçar. Dy të fundit pas marrjes së mjekimit janë larguar për në banesë, ndërsa 36-vjeccarja është ende në spital, jashtë rrezikut për jetën, tha më herët policia.
Të plagosurit dhe autori, sipas të njëjtave burime, “kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës”.
Lexo edhe:
Plagosja e trefishtë gjatë festës në Tiranë, në kërkim djali i biznesmenit – Detajet
Discussion about this post