Një 40-vjeçar, i identifikuar si Mariglen Jata, është paraqitur mbrëmjen e djeshme në spital pasi ka marrë një plagë me armë zjarri në këmbë. Ngjarja ka ndodhur rreth orës 22:20 në rrugën “Ramadan Citaku”, në zonën e Institut-it në Tiranë, ku dyshohet se është qëlluar nga një person ende i paidentifikuar.
Sipas informacioneve paraprake nga Policia, Jata ka marrë ndihmën e parë në spital dhe ndodhet nën kujdesin e mjekëve, ndërsa gjendja e tij është raportuar si e stabilizuar. Ende nuk dihen motivet apo rrethanat e plota që çuan në ngjarjen e mbrëmjes.
Policia e Tiranës ka identifikuar dhe shpallur në kërkim autorin që mbrëmjen e djeshme plagosi me armë zjarri një shtetas.
Nga veprimet e shpejta hetimore u identifikua autori i dyshuar, shtetasi Fatmir Frroku, 36 vjeç. Sipas Policisë, plagosja ka ndodhur rreth orës 22:20, pas një konflikti për motive të dobëta.
Burimet për mediat bëjnë me dije se dy të njohurit kanë qenë shokë më herët, por prej tre muajsh nuk kishin më komunikim. Sipas të njëjtave burime, mbrëmjen e së dielës, sapo Jata ka hyrë në rrugicën “Ramadan Çitaku”, autori i ka dalë përpara dhe e ka qëlluar, ndërsa më pas është larguar menjëherë nga vendngjarja.
Discussion about this post