Plagosja me armë zjarri në Prishtinë, dyshohet se është përfshirë një polic

Në plagosjen me armë zjarri të dy personave pasditen e sotme në Kosovë, dyshohet se është përfshirë një efektiv policie.

Ngjarja ka ndodhur në Mramorë të Prishtinës, ndërsa policia është duke hetuar mbi autorin. Paraprakisht, nuk ka detaje mbi shkakun e kësaj ngjarjeje, ndërsa të plagosurit nga ky rast janë dërguar në Qendrën Klinike Universitare të Kosovës për trajtim të mëtutjeshëm.

Hetuesit e IPK-së i janë përgjigjur informatave të para se zyrtari policor dyshohet të ketë shtënë me armë zjarri në drejtim të dy persona, por se ende nuk është bërë arrestimi i policit.

Rasti është duke u hetuar ndërsa në konfirmimin për plagosje, nga Policia e Kosovës deklaruan se hetuesit policor po vazhdojnë të merren me hetimet që lidhen me këtë rast.

“Sot rreth orës 15:30, është pranuar informacioni për një plagosje me armë zjarri të ndodhur në lagjen Suteskë të fshatit Mramorë të komunës së Prishtinës. Policia ka dalë në vendin e ngjarjes dhe mbështetur në të dhënat e para, janë ngritur dyshimet se dy persona, kanë marrë plagë nga arma zjarrit. Të njëjtit janë dërguar në QKUK për të marrë trajtimin e nevojshëm mjekësor. Aktualisht hetuesit policor kanë nisur një hetim për sqarimin e të gjitha rrethanave që karakterizojnë rastin”, tha zëdhënësi i Policisë së Kosovës, Agron Borovci.