Plagosja në “QS”, qëlloi disa herë me thikë në trup dhe qafë të riun, arrestohet 19-vjeçari

Policia e Tiranës ka arrestuar 19-vjeçarin Ajdin Ajazi, i cili mesditën e të enjtes plagosi me thikë një 20-vjeçar në Qytetin Studenti.

Sipas një komunikate për media, policia bën të ditur se është proceduar penalisht edhe një 52-vjeçar, i cili është personi që i ka shitur mjetin prerës të riut.

Ngjarja ndodhi në një kafene pranë një universiteti privat në Qytetin Studenti. I plagosur mbeti shtetasi Aron Demiraj, i cili mori plagë të shumta në trup dhe qafë. Ai po merr kujdesin e nevojshëm mjekësor në spital jashtë rrezikut për jetën.

Policia po vazhdon punën për zbardhjen e plotë të rrethanave të ngjarjes.

“Specialistët e Seksionit për Hetimin e Krimeve në Komisariatin e Policisë Nr. 1 arrestuan shtetasin A. A., 19 vjeç, banues në Kamëz, si dhe proceduan në gjendje të lirë shtetasin E. T., 52 vjeç, banues në Tiranë. Shtetasi A. A., ditën e djeshme, në Qytet Studenti, ka goditur me mjet prerës shtetasin A. D., i cili si pasojë është dëmtuar dhe ndodhet në spital, nën kujdesin e mjekëve. Nga veprimet hetimore të kryera ka rezultuar se autori i dyshuar e ka blerë mjetin prerës nga shtetasi E. T.”, thuhet në njoftimin e policisë.