Një ngjarje e rëndë ka ndodhur paraditen e sotme në qytetin e Shkodrës , ku një person me bicikletë ka qëlluar me armë mbi 40 vjeçarin Aleksandër Curri.
Curri qëndron i shtrirë në tokë, ndërsa një grua e pastrehë i qëndron tek koka duke e ndihmuar.
Më pas, i plagosuri është marrë me ambulancë dhe është dërguar në spital, ku ndodhet nën kujdesin e mjekëve.
Gruaja e pastrehë, deklaroi për gazetarët se ishte duke lypur dhe sapo ndodhi ngjarja shkoi t’i japë ndihmën e parë 40-vjeçarit.
Ajo u shpreh se i plagosuri qëndroi i shtrirë në rrugë për 10 minuta dhe se kishte marrë plumb në bark. Ndërsa autori, sipas saj, iku në këmbë, por shtoi se nuk e njihte.
“I dhashë ndihmën, isha duke lypur. Shkova me vrap e pashë. Autorin nuk e njoh. I plagosuri ka qëndruar i shtrirë për 10 minuta, shkova unë e para dhe kërkova ndihmë, derisa erdhi një efektiv i policisë rrugore. Kishte marrë plagë në stomak, kishte shumë gjak. Iku në këmbë autori, iku vrap dhe më pas u fut në këtë qoshe… nuk di gjë më”” u shpreh ajo.
Sipas dëshmitares, e cila ishte prezent në rrugë, autori shtiu disa herë në drejtim të 40-vjeçarit Aleksandër Currin.
Discussion about this post