Drejtori i Policisë në Qarkun e Shkodrës Edmond Sulaj ka dhënë detaje lidhur me ngjarjen e ndodhur pasditen e sotme në kryeqendrën e veriut, ku një person mbeti i plagosur me armë zjarri.
Ngjarja ka ndodhur në lagjen Xhabiej, ndërsa si pasojë e të shtënave me armë u plagos dhe ndodhet në spital Selami Brahimi.
Policia ka nisur hetimet, ndërsa kryepolici i Shkodrës ka pohuar se po bëhet këqyrja e kamerave të sigurisë dhe po pyetën dëshmitarët dhe vetë i plagosuri.
“Në orën 17:50 këtu në lagjen “Xhabiej” është qëlluar me armë zjarri shtetasi Selami Brahimi i cili është plagosur lehtë dhe është duke marrë mjekim në spitalin e Shkodrës. Është formuar grupi hetimor nën drejtimin e prokurorisë dhe po punon për dokumentimin e plotë të ngjarjes.
Janë duke u marrë kamerat e sigurisë si dhe po pyeten dëshmitarët okular që kanë dijeni për ngjarjen.
Ndërkohë do të intervistohet i dëmtuari. Sa i përket shkaqeve po punohet nga grupi hetimor për sqarimin e rrethanave.
Jemi duke punuar intensivisht për ta zbardhur dhe sigurojmë qytetarët se policia vendore e Shkodrës ka të gjitha kapacitetet për të zbardhur ngjarje të tilla”, u shpreh drejtori Sulaj.
Discussion about this post