Një konflikt mes dy adoleshentëve ndodhur në shkollën private “Mrekullia” në kryeqytet, ka përfunduar me plagosjen e njërit prej tyre.
Siç bën me dije policia, ngjarja ka ndodhur ditën e djeshme, në ambientet e shkollës në rrugën “Filip Shiroka”, te zona e njohur si “Kodra e Priftit”. Sipas të njëjtave burime, në vazhdën e një konflikti, një 15-vjeçar ka goditur me mjet prerës një bashkëmoshatar duke e plagosur. I lënduari është transportuar për në spital ku ka marrë mjekim. Më pas, është paraqitur në komisarit bashkë me prindërit për të bërë kallëzim lidhur me rastin.
Këtë të enjte, blutë njoftuan procedimin në gjendje të lirë të autorit.
Ngjarja, sipas të njëjtave burime, ndodhi “për motive të dobëta”.
“Specialistët për Hetimin e Krimeve në Komisariatin e Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë në ngarkim të një të mituri 15 vjeç, për veprën penale ‘Plagosja e lehtë me dashje’, parashikuar nga neni 89 i Kodit Penal”, njoftoi policia.
“Ditën e djeshme, në ambientet e një shkolle private në rrugën ‘Filip Shiroka’, 15-vjeçari, për motive të dobëta, është konfliktuar me një bashkëmoshatarin e tij, dhe gjatë konfliktit dyshohet se e ka goditur atë me mjet prerës. I dëmtuari pasi ka marrë ndihmën mjekësore në spital, është paraqitur për ankim në komisariat, së bashku me prindërit. Materialet i kaluan Prokurorisë”, shtuan të njëjtat burime.
Discussion about this post