Policia e Durrësit ka vënë në pranga 3 persona të cilët akuzohen për vepra të ndryshme penale. Specialistët për Hetimin e Krimeve në Komisariatin e Policisë Durrës, ndaluan personin me inicialet L. K., 24 vjeç, banues në Durrës, pasi Gjykata e Rrethit Gjyqësor Durrës, ka caktuar masën e sigurisë “Arrest me burg”, për veprën penale “plagosja e rëndë me dashje” dhe “trafikimi i armëve dhe i municionit”.
Personi në fjalë më 10 korrik të këtij viti, në vendin e quajtur lagja “Mirdita”, pas një konflikti për motive të dobëta, ka plagosur në këmbë me pistoletë, personin me inicialet T. P., 44 vjeç, banues lagja Nr.15, Durrës.
Ndërkohë që policia rrugore ka arrestuar dy persona për shkak se drejtimit të automjetit në mënyrë të parregullt dhe shkeljen e rregullave të qarkullimit rrugorë. Personat e arrestuar janë me inicialet, S. M., 25 vjeç, banues në lagjen Nr.8, Durrës, pasi u kap nga shërbimet e Policisë, duke drejtuar mjetin, pa leje drejtimi.
Si dhe F. M., 59 vjeç, banues në Fushë Krujë, pasi duke drejtuar motomjetin pa leje drejtimi, ka humbur kontrollin dhe ka dalë jashtë rruge, si pasojë është lënduar vetë drejtuesi i motomjetit dhe pasagjerja që ishte vajza e tij, të cilët ndodhen nën kujdesin e mjekëve, jashtë rrezikut për jetën.
Materialet kaluan në Prokurorinë e Rrethit Gjyqësor Durrës për veprime të mëtejshme.
