Një konflikt i ndodhur në orët e para të mëngjesit të sotëm në një lokal në Borsh ka përfunduar me plagosjen me armë zjarri të 33-vjeçarit Erald Shullazi, me origjinë nga Kruja. Shullazi ka marrë një plumb në dorë dhe aktualisht ndodhet në spital, jashtë rrezikut për jetën.
Policia e Himarës ka arritur të identifikojë dhe arrestojë autorin e dyshuar të plagosjes, Hekuran Çelaj, 42 vjeç, banues në Borsh, si dhe shokun e tyre, Albert Dollakun, i cili dyshohet se ka qenë i përfshirë në konflikt.
Ngjarja ka ndodhur rreth orës 02:20 të datës 31.07.2025, në një prej lokaleve të Borshit, ku miqtë ishin duke konsumuar alkool. Në rrethana ende të paqarta për mediat, mes tyre ka ndodhur një konflikt, dhe në një moment, Hekuran Çelaj ka nxjerrë një armë zjarri automatike dhe ka qëlluar në drejtim të Erald Shullazit.
Njoftimi i Policisë
“Shërbimet e Komisariatit të Policisë Himarë, pas njoftimit për një konflikt të ndodhur në një lokal në Borsh, rreth orës 02:20 të datës 31.07.2025, janë angazhuar menjëherë, duke shkuar në vendngjarje. Nga veprimet hetimore paraprake dhe këqyrja e pamjeve filmike, dyshohet se pas një konflikti midis disa shtetasve, shtetasi H. Ç. ka plagosur me armë zjarri automatike, shtetasin E. Sh., 33 vjeç, banues në Krujë, i cili ndodhet jashtë rrezikut për jetën. Autori i dyshuar, shtetasi H. Ç., 42 vjeç, banues në Borsh, është lokalizuar dhe shoqëruar në ambientet e DVP Vlorë, për veprime të mëtejshme procedurale. Gjithashtu, janë shoqëruar edhe disa shtetas të tjerë të përfshirë në konflikt”, njoftoi policia.
“Grupi hetimor, i përbërë nga specialistë për Hetimin e Krimeve të Rënda në DVP Vlorë, nën drejtimin e Prokurorisë, vijon punën për sqarimin e rrethanave, gjetjen e armës së zjarrit të dyshuar të përdorur dhe dokumentimin e plotë ligjor të kësaj ngjarjeje. Hetimet vijojnë për të zbardhur plotësisht motivet dhe rrethanat e këtij konflikti me armë zjarri”, shtuan të njëjtat burime.
Discussion about this post