Fundjava pritet të jetë me mot të paqëndrueshëm, reshje shiu dhe rënie temperaturash.
Meteorologia e Meteoalb, Lajda Porja, deklaroi se reshjet do të jenë më të përqendruara në jug dhe juglindje të vendit, ku priten edhe rrebeshe, ndërsa më të pakta do të jenë në veri dhe në qendër, përfshirë edhe Tiranën.
“Do të kemi reshje, më të shumta do të jenë në jug dhe juglindje, ku do të ketë rrebeshe. Më pak reshje do të ketë veriu dhe qendra, përfshirë edhe kryeqytetin. Edhe e shtuna dhe e diela, ndonëse në orët e paradites do të jenë kryesisht me kthjellime, pjesa e dytë e ditës do të ketë zhvillim të vranësirave, duke sjellë reshje, herë pas here edhe rrebeshe”, u shpreh Porja. në një deklaratë televizive.
Temperaturat do të shënojnë rënie të ndjeshme, duke i dhënë fund temperaturave të larta që karakterizuan pjesën më të madhe të shtatorit.
“Të shtunën do të jetë 27 apo 28 gradë. Një tjetër rënie na prek gjatë ditës së dielë. Dhe, në fakt, duke filluar që nga e shtuna, e diela, fillimi i javës tjetër do ta ndjejmë atmosferën e vjeshtës, për shkak se deri më tani kemi përjetuar një shtator shumë të nxehtë”, tha ajo.
Një tjetër element shqetësues do të jetë era, që në disa zona mund të krijojë probleme, veçanërisht në brigjet detare.
“Në disa momente do të shkojë deri në 50 km në orë. Do të jenë momente shumë të shkurtra, kjo do të bëjë që, sidomos të shtunën në mbrëmje dhe të dielën gjatë natës, të kemi një erë relativisht të fortë në brigjet detare, duke sjellë probleme edhe në trafikun detar”, paralajmëroi Porja.
Sipas Meteoalb, këto kushte atmosferike pritet të vazhdojnë edhe gjatë javës së ardhshme, duke sjellë më shumë lagështi, erë dhe temperatura tipike të sezonit të vjeshtës
Discussion about this post