Pas prezantimit të projektit të bashkëshortit të saj Jared Kushner për ndërtimin e një resorti luksoz me 5 yje në ishullin e Sazanit, Ivanka Trump ka zgjedhur që edhe këtë vit të frekuentojë bregdetin shqiptar. Kujtojmë që vitin e kaluar vajza e ish-presidentit amerikan Donald Trump, u ndal në bregdetin shqiptar.
Ndërsa një ditë më parë, jahti i Ivanka Trump është parë sërish në bregdetin e jugut, aty ku po pushon dhe kryeministri Edi Rama, ndërsa nuk përjashtohet një takim me palëve për të folur lidhur me investimin në ishull. Ditën e martë, rreth orës 09.00 të mëngjesit, jahti luksoz raportohet se është ankoruar në pjesën e bregdetit të Qeparoit.
Ivanka Trump dhe bashkëshorti i saj Jared Kushner kanë shprehur interes për të investuar në Shqipëri në sektorin e hoteleri turizëm. Ata janë duke planifikuar të ndërtonin disa hotele dhe vila luksoze në Ishullin e Sazanit dhe plazhin e Zvërnecit, të cilat janë dhe mbeten dy nga zonat zonë bregdetare më bukura në Vlorë. Investimi total raportohet se kap shifrën 1 miliard dollarë.
Kryeministri Edi Rama ka shprehur superlativa për projektin e Sazanit. “Ne kemi nevojë për super luks, ashtu si një shkretëtirë ka nevojë për ujë”, u shpreh Rama në një prononcim për “Financial Times”, më herët gjatë muajit.
Projekti megjithatë ka pasur kritika të shumta, me kritikët që vënë theksin te falja e ishullit – aktualisht Zonë e Mbrojtur – dhëndrit të Donald Trump.
Nisma u bë publike nga vetë dhëndri i Trump fill pasi socialistët miratuan në Kuvend ligjin e shumëkritikuar që parashikon lejimin e ndërtimeve në Zonat e Mbrojtura.
Lidhur me projektin ka folur së fundmi edhe Kushner. “Interesi për Shqipërinë erdhi nga një vizitë në vitin 2021. Isha i intriguar. Pastaj mundësia u shfaq rreth një vit më vonë. Jam kthyer edhe dy herë të tjera. Që atëherë për të kontrolluar gjërat dhe për t’u siguruar që ndihem rehat. Jam gjithnjë e më i emocionuar për potencialin”, citohet ai në një artikull të publikuar nga Bloomberg.
Discussion about this post