Një sherr mes të rinjve pranë shkollës ‘Andon Zako Çajupi’ në kryeqytet ka tronditur nxënësit dhe mësuesit e shkollës mëngjesin e sotëm. Nuk dihen arsyet e konfliktit të rënë të ndodhur pranë gjimnazit, por përdorimi i armëve ka tronditur gjithë zonën.
Ngjarja e rëndë ndodhi pas një debati mes 4 personave, e më pas u përshkallëzua. Të rinjtë përdorën sende të forta si karrige dhe tavolina, por nxorën edhe armët. Të shtënat me armë zjarri kanë tronditur nxënësit, mësuesit dhe banorët e zonës të cilët menjëherë kanë lajmëruar policinë.
Për të shuar konfliktin, fillimisht ka ndërhyrë një efektiv i policisë, por edhe pas ndërhyrjes së tij konfliki nuk është shuar, pasi një nga personat e përfshirë në ngjarje ka nxjerrë armën e zjarrit dhe ka qëlluar në ajër.
Kjo ngjarje e rëndë nxori në pah mungesën e sigurisë në shkolla, ndërsa oficeri i sigurisë nuk është parë të ndërhyjë në këtë ngjarje.
Në konflikt janë përfshirë 6 persona, 4 prejt të cilëve janë të lënduar, ndërkohë që mësohet se policia ka shoqëruar 5 persona në komisariat.
Në njoftimin zyrtar policia bën e dije se ka sekuestruar armën që është përdorur në këtë ngjarje, ndërsa 34-vjeccari me iniciale E.K ndodhet në spital për ndihmë mjekësore për shkak të plagëve që ka marrë.
“Pas marrjes së njoftimit se në rrugën “Kongresi i Manastirit” ishin duke u konfliktuar dyshohet me sende të forta 6 persona, menjëherë në vendngjarje kanë shkuar shërbimet e Policisë Rrugore, të cilat ishin në patrullim dhe kanë ndërhyrë menjëherë. Më pas në ndihmë të tyre kanë ardhur shërbimet e Patrullës së Përgjithshme dhe Forcat “Shqiponjat” të cilët kanë bërë të mundur parandalimin e përshkallëzimit të mëtejshëm të konfliktit dhe shoqërimin e 5 shtetasve të dyshuar si pjesëmarrës në konflikt, për veprime të mëtejshme. Si pasojë e konfliktit janë dëmtuar lehtë disa shtetas, ku njëri prej tyre shtetasi E. K. 32 vjeç, ka shkuar në spital për ndihmë mjekësore, i dëmtuar me sende të forta”, thuhet në njoftimin zyrtar të policisë.
