Ndeshja e futbollit mes Shënkollit dhe Orikut është kthyer në një arenë boksi mes lojtarëve të të dyja skuadrave dhe tifozëve vendas.
Përballja e vlefshme për javën e 6-të të Kategorisë së Dytë, Grupi A mes Shënkollit e Orikut degjeneroi në përplasje fizike mes futbollistëve. Burime nga klubi i bregdetarëve bëjnë me dije se konflikti ka nisur pas kartonit të kuq të marrë nga njëri prej lojtarëve vendas. Situata agravoi edhe më tepër në momentet kur Oriku kaloi në avantazh. Lojtarët e Shënkollit në gjaknxehtësi e sipër u goditën me futbollistët miq me grushte, ku ,më pas ndërhynë uniformat blu. Në dhunë u përfshinë dhe pjesëtarë të tjerë nga të dyja klubet, disa për të qetësuar situatën. Tifozët vendas hynë në fushë duke goditur lojtarët e Orikut me grushte, duke konfirmuar se siguria në stadium ishte zero.
U bë shoqërimi i disa personave në komisariat, teksa pritet që FSHF të marrë një vendim për të dyja klubet.
Ndeshja u ndërpre në rezultatin 0-1 në favor të Orikut, ku nuk mund të vazhdohej më tej për shkak të dhunës.
