Demokrati, Endri Hasa, ka reaguar sot kundër platformës “Bashkëqeverisje” të prezantuar nga Rama. Sipas kryeministrit, qytetarët e mund të shkruajnë në platformë për çdo problem zyrtar dhe aty do t’iu përgjigjen punonjësit që menaxhojnë atë. Por, sipas PD kjo platformë u krijua për të mos lënë pa punë patronazhistët e fushatës elektorale.
Përmes një postimi në Facebook, Hasa shprehet se Rama ka shpikur profesionin më të ri, me të cilin po dhunon privatësinë dhe lirinë e qytetarëve. “Patronazhisti” nga sot një profesion i ligjëruar dhe i paguar! Loja e shëmtuar me kontrollin dhe keqpërdorimin e të dhënave personale nga Partia Socialiste nuk ka fund. Nga sot, ajo që deri dje me të drejtë nga çdo mendje normale u cilësua si skandaloze dhe shkelje e çdo të drejte privatësie për socialistët u përfshi në ligj.
Edi Rama i hapi rrugë sot të veshurit me pushtet një tjetër kontigjenti militantësh me qëllim kontrollin e të dhënave tuaja në çdo institucion dhe zyrë të shtetit shqiptar ku ju si qytetar do të trokisni. Edi Rama thotë: Nëse ju keni një problem në çdo zyrë shteti më shkruani në platformën për “Bashkëqeverisjen” sepse aty do t’iu presin patronazhistët e mi”, shkruan ai.
Hasa paralajmëron qytetarët që të mos bëhen pjesë e kësaj platforme sepse patronazhistët do të jenë aty vetë për t’iu vjedhur të dhënat dhe jo për t’i ndihmuar. “Do të jenë pikërisht këta patronazhistë që jo vetëm do të kujdesen të ndëshkojnë zyrtarin e administratës që nuk iu ka shërbyer por akoma më shumë do të marrin çdo të dhënë tuajën për t’ia kaluar deputetëve socialistë apo drejtuesve lokalë që t’iu bindin apo t’iu joshin në këmbim të votës. Nuk ka fund marrëzia”, shkruan ai.
Kujtojmë se, PD i ka bërë kërkesë SPAK që të hetojë patronazhistët e PS, që grumbullonin të dhënat e votueseve gjatë fushatës elektorale për zgjedhjet e 25 prillit.
Discussion about this post