Debutoi në stolin e Shqipërisë tre vite më parë pikërisht në këtë stadium, por trajneri Sylvinho sot vjen më i pjekur dhe me më shumë ide sesi të “marrë hak” në një ndeshje historike për kuqezinjtë. Mbrëmjen e 27 marsit 2023 në ‘PGE Arena’ të Varshavës Polonia fitoi 1-0 kundër Shqipërisë me golin e Karol Swiderski në minutën e 41-të, por nesër Shqipëria kërkon fitoren që do na dërgonte më pranë ëndrrës së madhe, kalimit për herë të parë në finalet e një Botërori.
Nga stadiumi në Varshavë, trajneri i Kombëtares dhe kapiteni Berat Gjimshiti folën për mediet.
“Sa e ndjen peshën e ndeshjes? Po sigurisht, e kemi ndjerë si kur kemi arritur “play off”. Eksperienca në ndeshjet e fundit të kombëtares, ka treguar që zhvillimi ka qenë i mirë. Besoj do jemi gati nesër për maksimumin, kundërshtari ka nivel të lartë dhe do provojmë gjithçka për të arritur këtë ëndërr.
Sa gati jemi? Besoj se ekipi do jetë gati, është rast i madh dhe besoj nuk ka shumë lidhje eksperienca në këto ndeshje, por dëshira, vullneti, djersa dhe çdo gjë që lë në fushë. Ai që është më i aftë do fitojë.
Në këtë moment nuk mund të zgjedh, mes Europa League apo Botërorit. Por, si kapiten, një Botëror me Shqipërinë, do të ishte diçka e madhe. Mendojmë vetëm për nesër, pastaj të shohim ccfarë do të ndodhë.
Unë besoj që shanset kur futesh në fushë janë 50-50. Unë në fushë futem vetëm për fitore, po ashtu edhe Kombëtarja. Kemi marrë shumë eksperiencë në ndeshjet e fundit. Kjo mendoj se do të na ndihmojë. Për taktikën vendos trajneri. Duhet të jemi perfektë për të fituar ndaj Polonisë”- tha Gjimshiti
Të dyja skuadrat janë përballur 15 herë në histori, me dhjetë fitore të Polonisë, dy fitore të Shqipërisë dhe tre barazime. Nga këto takime, vetëm pesë kanë qenë miqësore. Fitoret e Shqipërisë datojnë më 29 nëntor 1953, 2-0 në ‘Qemal Stafa’ me golat e Loro Boriçit dhe Refik Resmjas, si dhe në takimin e fundit mes tyre, po 2-0 më 10 shtator 2023 në ‘Air Albania’, me golat e Jasir Asanit dhe Mirlind Dakut.
gijotina.com/
Discussion about this post