Plazh në dimër? Çuçi porosit shezlongë druri dhe dyshekë gome për Kavalishencën

Në vend t’u japë policëve orët jashtë orarit dhe dietat e papaguara, Bledi Çuçi blen shezlongë. Ministri nuk duron as të vijë vera, por i porosit këto sende në stinën e shirave. Ministria e Brendshme ka lidhur kontratën për të blerë shezlongë për Shtëpinë e Pushimit në Durrës. Bëhet fjalë për tenderin me numër reference REF -44081-09-30-2022 dhe objekt “Blerje shezlongë dhe dyshekë (plazhi)”. Kësisoj, Çuçi do të shpenzojë 20 milionë lekë për dyshekë dhe shezlongë që të bëjnë pushime në mes të tetorit.

Shezlongë dhe dyshekë modern

I angazhuar seriozisht për pushimet e policëve, Çuçi kërkon dyshekë dhe shezlongë special, jo nga këto të thjeshtët që përdoren rëndomë në plazhe. Do të jenë 174 shezlongë me dyshekë me specifika mondane. Në përshkrimin e produktit shkruhet se materiali i shezlongëve duhet të jetë dru ahu i stazhionuar, ngjyrë kafe e errët me gjatësi 190 cm dhe gjerësi 60 cm. Këto kërkesa Çuçi i ka edhe për dyshekët. Në dokument thuhet se duhet të jenë material dok i gomuar ngjyrë bezhë. Me këto kërkesa i bie që minimalisht të shpenzohet 110 mijë lekë për një shezlong bashkë më dyshekun. Ky rezultat del nëse do të pjesëtonim Fondin Limit me numrin e shezlongëve të kërkuar.

60 mln lekë për kalçeto

Shtëpia e Pushimit në Durrës duket se është një prioritet për Çuçin. Disa muaj më pari Ministria e Brendshme ka hapur një tender që të ndërtojë një fushë kalçeto të Kavalishenca. Për këtë do të shpenzohen jo pak por gati 60 milionë lekë të vjetra me TVSH. Bëhet fjalë për procedurën e prokurimit me numër reference REF-08725-10-19-2021 dhe me objekt “Ndërtim Kalçeto”. Fondi limit është 6,143,333 lekë të reja pa TVSH. Fituese është shpallur kompania EURONDERTIMI 2000 me vlerë të ofruar 4,798,278 lekë të reja ose rreth 60 milionë lekë të vjetra përfshirë TVSH. Me sa duket  punonjësit e policisë do të kenë kohë të luajnë futboll e të bëjnë plazh në çdo sezon, për kriminelët nga dimri po iu teproi koha.

©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.