Elvis Plori, trajneri i Vllaznisë, në prag të ndeshjes kundër Skënderbeut doli para mediave dhe mes të tjerash deklaroi: “Nuk ka asnjë ndeshje të lehtë. Duhet vlerësuar maksimalisht edhe kjo ndeshje, duke ditur edhe ecurinë jo shumë të mirë që kemi patur në ndeshjet e fundit.
Në 5 javët e fundit kemi 2 humbje dhe 3 barazime. Po shënojmë shumë pak dhe kështu që duhet ta vlerësojmë maksimalisht edhe këtë sfidë dhe të jemi shumë seriozë në fushë”.
“Ne shpresojmë që kalendari i këtyre dy ndeshjeve të radhës të jetë një frymëmarrje për ne, por e rëndësishme është që pjesa ofensive e skuadrës tonë të funksionojë më mirë. Në ndeshjet e fundit nuk e ka bërë si duhet këtë gjë. Duhet që ndaj Skënderbeut, ato mundësi e raste që do na krijohen, t’i shfrytëzojmë dhe të marrim fitoren”.
“Edhe unë ndjehem keq kur dëgjoj të thuhet se kur do ta marrë fitoren e parë Plori. Edhe unë ndjehem keq nga kjo situatë e krijuar. Gjithsesi unë jam një djalë shkodre dhe kam patur mbështetjen tuaj gjatë gjithë kësaj kohe”.
“Nuk është se kam ardhur tani unë këtu, jam prej dy vitesh pjesë e Vllaznisë. Më shumë se unë besoj se askush nuk e do më shume fitoren dhe deri tani mund të them se kemi bërë vetëm një punë të mirë, kualifikimin në finalen e Kupës.
Vetëm aty jam ndjerë mirë dhe shpresoj që deri në fund të kemi edhe shumë momente të tjera të tilla dhe të arrijmë objektivat që kemi”, përfundoi trajneri i Vllaznisë, Elvis Plori.
Discussion about this post