Në A2 CNN kreu i Lëvizjes “Shqipëria Bëhet”, Adriatik Lapaj zbuloi se forca politike që ai drejton mund të shkrihet në një parti të vetme me partnerin e koalicionit parazgjedhor, “Nisma Thurje”.
“Partia Nisma Thurje është një parti me një anë. Ne jemi Lëvizja ‘Shqipëria Bëhet’, që është parti me një anë. Kemi bashkëpunuar për koalicionin parazgjedhor”, tha Lapaj por nënvizoi se “bashkëpunimi vazhdon edhe tani”.
Më tej ai shtoi se janë duke negociuar me partinë e drejtuar nga Endri Shabani dhe Panajot Soko, mënyrën sesi do të shndërrohen në një forcë politike të vetme.
“Me përfundimin e këtij procesi do të rinegociojmë sesi do ta vazhdojmë rrugëtimin tonë. Para zgjedhjeve ka pasur një qasje, që mund të ndodhë një kohezion edhe të shkrihemi në një. Ngelet për tu diskutuar. Unë jam i hapur për të gjitha variantet, ngelet për tu parë. Por mund të ndodhë. Ne e shohim të mirëseardhur çdo bashkim që sjell vlera dhe ne mendojmë që sjellim vlera”, deklaroi Lapaj.
Ndërkohë, analisti Afrim Krasniqi tha se shkrirja në një forcë politike të vetme, “është e vetmja alternativë që kanë”.
Ai deklaroi se në Parlament do të jetë opozitë dhe do të votojë vetëm ligjet që kanë lidhje me integrimin e vendit në Bashkimin Europian.
“Ne në atë Parlament do të votojmë vetëm ato ligje që lidhen me integrimin europian dhe që janë në favor të Shqipërisë. Nëse një ligj është nevojë për të vazhduar procesi i integrimit dhe nuk cenon thelbin e rendit tonë kushtetues, ligjor apo moral të shoqërisë, normalisht nuk do të bëhemi pengesë në këtë drejtim”, tha Lapaj.
“Për pjesën tjetër të ligjeve të zotërisë, që do të vijë e të bëjë ato që do të bëjë, ne do të jemi opozitë në atë Parlament dhe kaq. 83 vota që ka, janë në kufijtë e numrit 84 dhe me 84 vota ka shumicë të cilësuar me të cilën ndryshon kodet. Kjo do të thotë se të gjitha ndryshimet kushtetuese që kanë ndodhur për SPAK-un, mund të zhbëhen me ndryshime kushtetuese falë këtyre 84 votave, edhe pse nuk janë aq sa për të ndryshuar Kushtetutën. Edhe një votë u duhet dhe ta kthejnë SPAK-un thjesht një formalitet”, shtoi Adriatik Lapaj.
Discussion about this post