Policia e Pogradecit ka kapur në flagrancë katër të rinj që po hapnin gropa në Varret Monumentale Ilire të Selcës së Poshtme në Mokër. Ngjarja ndodhi pas njoftimit të banorëve të fshatit, të cilët vërejtën të rinjtë me detonatorë metalesh duke gërmuar në pjesën anësore të territorit arkeologjik dhe informuan menjëherë inspektorin e zonës.
Burime policore bëjnë me dije se të rinjtë janë nga zona e Korçës dhe aktualisht po kryhen veprimet hetimore në terren, para se ata të shoqërohen në komisariat. Ky është rasti i parë kur policia kap në flagrancë persona që gërmojnë për të gjetur metale ose objekte arkeologjike me vlerë në varret Ilire.
Sipas burimeve, tre gërmime të paligjshme të ngjashme janë regjistruar gjatë 2-3 muajve të fundit, por pa autorë të identifikuar. Varret Ilire të Selcës, që datojnë nga fundi i shekullit IV para Krishtit, janë unike në Evropë dhe janë shpallur zonë A arkeologjike. Megjithatë, futja e personave në këtë zonë është e lehtë, pasi ajo nuk është e rrethuar nga Ministria e Kulturës.
Sipas ekspertëve, ndërtimi i rrugës së re Qukës-Qafë Plloçë, që kalon pranë varreve, ka lehtësuar aksesin për personat që kërkojnë ar ose objekte arkeologjike, duke rritur rrezikun për dëmtime në këtë pasuri historike.
Discussion about this post