Prej muajsh banorët e Paskuqanit dhe Laprakës protestojnë për të mbrojtur banesat e tyre që preken nga projekti i Unazës së Madhe. Gjatë kësaj kohe zëri i tyre nuk është dëgjuar as nga Bashkia dhe as nga qeveria, e cila i ka përcjellë me premtime dhe gënjeshtra. Kështu, tepët të revoltuar ata janë futur mëngjesin e sotëm brenda ambienteve të ARRSH për të kërkuar informacion lidhur me Projektin e Unazës së Madhe.
Nga ana tjetër banorët zotohen për mbrojtjen e pronave të tyre ndërsa kërkojnë zbatimin e ligjit duke kundërshtuar devijimin e projektit të Unazës së Madhe. “Atë punonjësin e IKMT-së kur të më vijë në lagje, ça t’i bëj? Ku të shkoj me gjithë kalamajtë unë po më morën shtëpinë, ti kërkoj firmës? Nuk duam të hakmerremi për të drejtat tona me Kanun, ne duam ligjin e këta na spostojnë. Shtyj, shtyj ngelën duke na thënë, nuk jemi zaptues”, tha një banor.
Kujtojmë se kundërshtitë e tyre ndaj këtij projekti vijojnë prej kohësh, ndërsa herën e fundit që shkuan në këtë institucion nuk morën asnjë informacion. Përgjegjësi i sektorit të shpronësimeve u komunikoi se nuk mund tu jepte asnjë lloj informacion mbi projektin, duke u kërkuar banorëve të dorëzonin një shkresë të cilën tua dërgonte organeve kompetente. Banorët nga ana tjetër thanë se kërkesa me shkrim është procedurë që vonon pasi sipas tyre puna në terren ka nisur dhe se projekti ka devijime.
Discussion about this post