Detaje të reja kanë dalë në dritë nga plagosja e dy të rinjve me armë zjarri në Tiranë mbrëmjen e djeshme.
Mësohet se, Enis Sanxhaku 20 vjeç dhe Noa Mato 19 vjeç kanë qene duke u kthyer nga kalçeto, ku si pasojë e një manovre të gabuar në rrugë janë konfliktuar me dy drejtues mjetesh.
Të pyetur nga hetuesit në spital, ata kanë thënë se kanë bërë një manovër të gabuar me makinë dhe i kanë prerë rrugën një makine tjetër, që po lëvizte në këtë aks. Sipas dy të rinjve, pas kësaj manovre janë përfshirë në konflikt me drejtuesin e mjetit, që i kanë prerë rrugën, dhe miqtë e këtyre të fundit, që lëviznin me një tjetër mjet.
Nga dëshmia e parë e dhënë nga spitali, të rinjtë janë shprehur se konflikti ka precipituar deri në përdorimin e armëve, ku pas plagosjes kanë mbërritur në Spitalin e Traumës me makinën e tyre, ku po marrin ndihmën mjekësore dhe ndodhen jashtë rrezikut për jetën.
Ngjarja ka ndodhur te “Mbikalimi i Qafë-Kasharit”, pas mesnatës, ndërsa policia ka ngritur pika të shumta kontrolli në të gjitha hyrje-daljet e Tiranës për identifikimin dhe kapjen e autorëve të ngjarjes.
