Një raketë ruse goditi mëngjesin e sotëm lagjen Slobidsky, që ndodhet në zonën qendrore të Kharkiv.
Objektivi i sulmit ishte një ndërtesë në një rrugë të rrethuar nga shtëpi civile.
Të paktën 51 persona mes tyre edhe një 8-vjeçar kanë mbetur të vdekur nga një sulm rus në fshatin Hroza, në jug-lindje të Kharkiv. Banorët e fshatit po merrnin pjesë në një varrim kur u goditën nga një raketë. Ministria e Mbrojtjes e Ukrainës tha se nuk kishte objektiva ushtarakë në zonë, vetëm civilë, raporton BBC.
Kreu rajonal i Kharkiv, Oleh Synyehubov e përshkroi sulmin si një nga krimet më të përgjakshme të rajonit. Ai konfirmoi se të gjithë ata që vdiqën ishin banorë të fshatit dhe se sulmi i sotëm vrau 20% të popullsisë së tij.
“Një e pesta e këtij fshati ka vdekur në një sulm të vetëm terrorist,” tha ai në televizionin kombëtar. Ministri i Brendshëm ukrainas Ihor Klymenko tha se çdo familje ishte e prekur në fshat.
Interfax Ukraine raportoi se funerali ishte për një ushtar ukrainas. E veja e tij, djali, gjithashtu ushtar dhe nusja ishin në mesin e të vrarëve, citoi gazeta të ketë thënë prokurori lokal Dmytro Chubenko. Ushtari ishte varrosur më parë në Dnipro, por të afërmit e tij thanë se donin ta rivarrosnin në fshatin e tij të lindjes.
Presidenti ukrainas Volodymyr Zelensky tha se akti “nuk mund të quhet as një akt kafshëror – sepse do të ishte një fyerje për kafshët”.
Ai akuzoi Rusinë për shënjestrimin e qëllimshëm të fshatit ndërsa njerëzit u mblodhën për shërbimin përkujtimor dhe tha se “nuk ishte një goditje e verbër”.
Distrikti Kupyansk, pjesë e të cilit është fshati, ka qenë në vijën e parë të përleshjeve midis ushtrive ruse dhe ukrainase që kur Vladimir Putin filloi pushtimin e tij në shkallë të gjerë në shkurt të vitit të kaluar.
Discussion about this post