Sokol Mjacaj, i dënuar me burgim të përjetshëm për vrasjen e dy turistëve çekë rreth 8 vjet më parë, u rikthye në qendër të vëmendjes ditën e djeshme, pasi me një armë zjarri vrau në burgun e sigurisë së lartë të Peqinit, Arben Lleshin, i dënuar me 32 vjet heqje lirie, për vrasjen e një bashkëatdhetari të tij në Angli.
Mjacaj qëlloi disa herë mbi Lleshin, i cili humbi jetën pa mbërritur në spital.
Prej mbrëmjes së djeshme, Mjacaj merret herë pas here në pyetje nga grupi hetimor, ndërsa është transferuar në Drejtorinë e Policisë së Elbasanit. Dëshmia e tij se vrau Lleshin për shkak të një konflikti të krijuar në burg, nuk ka bindur grupin hetimor, të cilët kanë dyshime se vrasja është e porositur nga persona të tjerë.
Ndërkohë janë zbuluar detaje të reja nga dëshmia e Mjacajt, i cili e kreu krimin, 1 orë pasi në media njoftohej se ministri i Drejtësisë, Ulsi Manja, kishte firmosur urdhërin për ta izoluar të dënuarin në 41bis.
Kjo duket se ka ndikuar në përshpejtimin e krimit nga ana e Mjacajt, gjë që pohohet edhe prej vetë atij, para grupit hetimor.
Detajet janë zbardhur në studion e emisionit Review nga gazetari Aldo Kozarja.
Sipas gazetarit, Mjacaj ka pohuar se nëse nuk do ta merrte vesh që do të izolohej në 41 biss, nuk do ta kryente krimin në fjalë.
“Për t’u ndalur te ngjarja pasi është kryer vrasja kemi të bëjmë me një moment të rëndësishëm. Sokol Mjacaj i ka thënë zyrtarëve të grupi hetimor kur e kanë marrë në pyetje, nëse unë nuk do të merrja vesh se isha vendosur të futesha në 41 bis, nuk do ta kryeja këtë veprim sot. Ia ka thënë zyrtarëve të lartë këtë gjë është në dokumenta.
E ka kryer vrasjen nga njoftimi që ka marrë. Zyrtarë të policisë Shkodër kanë zhvilluar mbrëmjen e djeshme dhe një kontroll në banesën e tij në Prekal në Shkodër”, tha gazetari.
Discussion about this post