Po pensionistët? Bylykbashi: Skandaloze rritja e pagave për gjyqtarët

Deputeti i PD-së, Oerd Bylykbashi ka dalë kundër rritjes së rrogës për gjyqtarët e Kushtetueses.

Ai deklaroi në Kuvend se pensioni minimal është 7800 lekë të reja, ndërsa për gjyqtarët e Kushtetueses kërkohet pagë dinjitoze duke e quajtur arsyetimin “skandaloz”.

“Ne e kemi pensionin minimal 78 mijë lekë të vjetra, ky është një turp. Sa arrijnë këtë qytetarë, t’u rrijë me dinjitet termi qytetar, sa detyrohet të paguajë për ilaçet që nuk rimbursohet, paguan ujin dhe energjinë elektrike. Pensioni në fshat mesatar është nën 100 mijë lekë, ndërsa në qytet 150 mijë lekë, por llogaria mbetet e njëjtë. Minimumi jetik është afër 200 mijë lekë të tjetra, kemi bërë propozim një nisëm ligjore që nuk merret në shqyrtim për minimunin jetik, ju refuzoni. Të gjitha ligjet nga opozita i mbani pezull. Kur uleni në restorant vrisni mendjen se çfarë bëni me 75 mijë lekë?

Sot sillet ligji për rritjen e pagës së gjyqtarëve të Gjykatës Kushtetuese, arsyetimi kryesor është skandaloz, duhet pagë dinjitoze dhe paga dinjitoze është 644 mijë lekë të reja për gjyqtarët e Kushtetueses, paguajmë dy gjykata edhe atë të Vettingut. Kurse pensionisti, thotë “po dinjiteti im ku është”. Atyre nuk ia rrisim pensionin”, tha Oerd Bylykbashi.