Kreu i Partisë Demokratike, Lulzim Basha, bëri një deklaratë të fortë jashtë dyerve të Parlamentit, kur tha se po prishen provat për aferën e inceneratorëve, ndërsa shtoi se makina e prokurorëve është nisur për të arrestuar një zyrtar të lartë të PS, por është kthyer mbrapsht në mesnatë.
“Sot, njerëzit më të afërt të tij, janë në arrati. Ai ju jep imunitet. Edi Rama e di mirë se nëse drejtësia e merr këtë punë kolosale të komisionit të Tabakut dhe e kthen në ndjekje, kjo do të shembë ngrehinën 30-vjecare të korrupsionit shqiptar. Të kthesh mbrapsht makinat që nisen për të arrestuar zyrtarët e lartë në mes të natës, ky është problem i jashtëzakonshëm. Prandaj, thirrja që bëra ishte e qartë se kemi nevojë të jemi njerëz në radhë të parë, pastaj politikanë. Si njerëz e kuptojmë se dhe ata të SPAK janë njerëz, prindër, bashkëshortë, dhe të gjendur në presion direkt nga Edi Rama apo të dërguarit e tij, padiskutim që janë në pozita të pabarabarta. Janë kërcënuar drejtpërdrejt nga një qeveri e kapur në vjedhje, ndaj dhe ata duhet të kenë mbështetjen e plotë të qytetarëve. Mbështetja ime nuk është thjesht si qytetar, por si kryetar i PD”, tha Basha.
Teksa i bëri thirrje SPAK të veprojë e të zbardhë aferën, Basha deklaroi se prokurorët duhet të kishin shkuar në sallën e Komisionit Hetimor e të shpallnin të pandehur disa zyrtarë aty, pasi sipas tij, në këto momente mund të jenë duke prishur provat, duke intimiduar apo duke ndihmuar të përfshirë të largohen nga vendi.
Discussion about this post