Policia Kombëtare e Spanjës ka arrestuar 2 shqiptarë si pjesë e operacionit “LUX”, pasi ka gjetur më shumë se 1000 kilogramë kanabis në një shtëpi fshati në Pelayo, zona e Algecira, e përdorur nga një organizatë kriminale për të fshehur drogën.
Të arrestuarit po ruanin depon, të armatosur me tre pushkë automatike tip Kallashnikov (AK-47), të mbushura dhe në gjendje të përsosur pune, të përgatitura për të zmbrapsur çdo përpjekje ndërhyrjeje nga policia ose bandat rivale, thanë autoritetet.
Hetimi e identifikoi pronën si një “shtëpi të fshehtë”, një term i përdorur për vendet ku ruhen sasi të mëdha narkotikësh.
Droga ishte kontrabanduar përgjatë bregdetit midis Algeciras dhe Tarifa (ngushtica e Gjibraltarit), një rrugë e zakonshme e trafikimit të drogës.
Të ndaluarit, dy shtetas me origjinë shqiptare, ishin përgjegjës për mbikëqyrjen dhe sigurinë e ngarkesës, një funksion kyç brenda strukturës kriminale për të garantuar mbrojtjen e mallrave të paligjshme. Sasitë e drogës ishin të sistemuara nëpër valixhe dhe çanta transporti.
Pas arrestimit të tyre, të dy u çuan para Gjykatës së Detyrës së Algeciras, e cila urdhëroi burgosjen e tyre, duke pasur parasysh seriozitetin e ngjarjeve dhe rrezikun që lidhej me përdorimin e armëve të luftës, e cila i ka lënë në paraburgim, ku vijojnë të jenë ende.
Operacioni ka nisur që prej javëve të para të muajit janar dhe hetimet janë ende në proces, pasi besohet se ka një rrjet të organizuar trafiku që është më i gjerë, për identifikimin dhe kapjen e personave të tjerë.
Policia paralajmëron për një rritje të dhunës dhe përdorimit të armëve të zjarrit në zonën e “Campo de Gibraltar”, duke reflektuar kapacitetin operacional dhe shtrirjen ndërkombëtare të këtyre rrjeteve.
Hetimi mbetet i hapur dhe arrestime të mëtejshme janë të mundshme.
Discussion about this post