Pas disa orëve diskutime, ministrat e jashtëm të BE-së kanë rënë dakord të pezullojnë një marrëveshje për lehtësimin e vizave të vitit 2007 me Rusinë lidhur me luftën e vendit në Ukrainë. Lajmin e ka bërë të ditur kryediplomati i BE-së, Josep Borrell, i cili ka thënë në një deklaratë për mediat se me marrjen e këtij vendimi rusët tani do ta kenë më të vështirë sigurimin e një vize dhe procesi do t’iu kushtojë më shtrenjtë.
“Jemi pajtuar për pezullim të plotë të marrëveshjes lehtësuese për viza mes BE-së dhe Rusisë. Ky vendim do të ndikojë në zvogëlim të numrit të vizave të reja që lëshohen nga vendet anëtare të BE-së. Procesi do të jetë më i vështirë, do të jetë më i gjatë”, u shpreh Borrel. Diplomatët kanë thënë se ministrat e BE-së nuk kanë arritur të pajtohen për një ndalesë totale për vizat turistike për rusët, meqë vendet anëtare janë të ndara në këtë çështje. Borrell ka thënë se ka rritje të konsiderueshme të numrit të kalimeve kufitare nga Rusia drejt vendeve fqinje prej mesit të muajit korrik. Ndërkaq, kujtojmë se para sezonit veror i është kërkuar edhe Shqipërisë që të bllokojë hyrjen e turistëve rusë në territorin shqiptar, por deri më tani nuk është marrë asnjë vendim. Akoma nuk dihet se si do të veprojë qeveria shqiptare pas këtij vendimi të BE-së.
Discussion about this post